Гьуьрметлу редакция!
Зун чи газетдихъ галаз гьамиша дуствал хуьзвайбурукай сад я. Жуванбурукай ни виниз тир тIвар къазанмишзаватIа, вини дережадиз гьи хуьр хкаж жезватIа, за чи газетдай кIелзава. Куь коллектив сагъ-саламат хьуй. Квехъ еке агалкьунар хьун зи мурад я.
Къе и чар кхьиз мажбурнавайди июндин вацран пуд нумрадиз акъатай, дяведа хьайи чи дахдикай кхьенвай “Гиливидин йикъар-йифер” тIвар алай макъала я. Адан рикIел хкунар.
Дуьз лагьайтIа, абур дахди вичин аялриз, хтулриз, птулриз, къвезмай несилди кIелун патал кхьенвай.
Ада лугьудай: “Къуй жув амачир девирдани зи несилриз чир хьурай, вучиз а дяведиз “ЧIехи дяве” лагьанватIа. КIелрай, рикIел хуьрай”.
Гьуьрметлу редакция, заз ва чи Керимхановрин вири хизанриз куь коллективдиз, иллаки Мердали Жалиловаз, рикIин сидкьидай сагърай лугьуз кIанзава. Чи дах кьилин образование авай кас тир. Адаз педагогикадин, медицинадин, юриспруденциядин рекьерай еке чирвилер авай. Немс чIалални (тIимил) рахадай. Амма лезги чIалан кхьинар артух пайгар тушир, гьавиляй ада вири урус чIалал кхьена. Мердали стхади лап хъсан таржума авуна. Заз ана авай ихтилатар дахдивай ван хьанвайтIани, урусдал кIелнавайтIани, лезги таржумади зи чандик лап зурзун кутуна. На лугьуди, Жалиловни Керимханов санал дяведа хьанай.
Мердали стха, вун лезги газетдин дестек я. Вахъ чандин сагъвал, куь коллективдихъ еке агалкьунар хьурай!
Тамила Набиева
