Алай вахтунда лезгийрихъ жуьреба-жуьре хилерай жегьил алимар гзаф ава. Волгоград шегьерда чIехи хьайи Ренат Фаикович Абдулкеримовни илимдин рекьяй вини дережайриз хкаж жедай мумкинвилерни алакьунар авай алим, технический илимрин кандидат я.
Ам 1994-йисан 16-августдиз Волгоград шегьерда КцIар райондин Манкъулидин хуьряй тир Фаикан хизанда дидедиз хьана.
Ватандиз мукьва ва хъсандиз хайи чIал чир хьун патал ам диде-бубади гъвечlи чlавуз гьар йисан гатун береда хуьруьз рахкурдай. Мектебда кIелай йисара ам чирвилер къачунихъ галаз сад хьиз футболдални машгъул хьана. Са вахтара ада рикIивай футболдал машгъул хьуникай фикирна, амма гуьгъуьнлай кIелунар давамарун, илимдин рекьяй фин важиблу яз гьисабна.
Ренат хайи халкьдин тарихдални машгъул хьана, и рекьяй адаз вичин эме, шаир Гуьлбес Асланхановади куьмекар гана. Волгоградда лезги шаир ва журналист Гьилал Аскерова лезги чIалан тарсар кьиле тухудайла, Рената активдаказ иштиракна.
“Гьилал муаллимди чак ватанпересвилин руьгь кутуна, ам зи уьмуьрда кьилдин са вакъиа я, адан гуьзчивилик кваз чна лезги чIалан грамматика чириз башламишна, милли мярекатар тешкилна”, — ихтилатзава Рената.
Мектеб акьалтIарайдалай кьулухъ ам Волгограддин технический вуздик экечIна. Агалкьунралди вуз куьтягьайдалай кьулухъ бубади адаз кIелун, илимдал машгъул хьун давамарун герек тирди лагьана. ИкI, талукь имтигьанар вахкана, ам нафтIадинни газдин хиляй Москвада авай Россиядин халкьарин дуствилин университетдиз (РУДН) гьахьна, тафаватлудаказ магистратура куьтягьна.
Ада илимдин рекьяй диде-бубади вичик кутур умудар гьакъикъатдиз элкъуьрзава, вич патал абуру чIугур зегьметар бадгьавая тефенвайди успатзава.
КIелунар давамарун патал Москвадиз фейилани, адаз гъвечIи ваха, мукьвал-мукьвал почтадай герек затIар ракъуриз, датIана куьмекар гана. Садлагьана чIехи шегьердихъ галаз вердиш хьун, жуван вилик эцигнавай макьсадар кьилиз акъудун регьят карни туш.
Магистратурада кIелзавай вахтунда ада КВН-да иштиракиз башламишна, ам университетдин хкягъай “RUDN United” командадин капитан хьана. 2018-йисуз адан командади Александр Масляковаз агалкьунралди чпин алакьунар къалурна ва кьиблединни рагъакIидай патан лигадин ярумчух финалдизни акъатна. Гуьгъуьнлай ада дустарихъ галаз Дагъустандин векилханадин “Там-Тут” тIвар алай команда арадал гъана ва 2021-йисан гатфарихъ 2-турдиз акъатайдалай кьулухъ телевизионный лигадик акатна.
Магистратурадин 2-курсуна кIелзавай чIавуз Ренат Абдулкеримова РУДН-дин патай нафтIадинни газдин крарин хиляй Вирироссиядин олимпиадада иштиракна ва приздин чка кьуна. Хъсан чирвилер къалурай ватанэгьлидиз тежриба кIватIун патал газдихъ галаз алакъалу “Сибур Холдинг” компаниядиз теклифна, гуьгъуьнлай адакай анин кьилин офисдин къуллугъчи хьана ва исядани и чIехи тешкилатда кIвалах давамарзава.
Ада гьа сифтедилай пешедин рекьяй вич хъсан къуллугъчи хьунин макьсад вилик эцигна. Жегьил алимди къейдзавайвал, кьил кутазвай гьар са карда адаз хизанди куьмекар гана, гьевес хкажна.
Магистратура агалкьунралди куьтягьайдалай кьулухъ РУДН-да ам аспирантурадикни экечIна, 2001-йисуз сифте хкягъай пешедин рекьяй технический илимрин кандидатвилин диссертация хвена. Къуй чахъ Ренат хьтин къастунал кIеви жегьилар гзаф хьурай!
К.Ферзалиев
