За са кардиз фикир гана: “Лезги газетдихъ” галаз жуьреба-жуьре йисара алакъаяр хвейи ва хуьзвай мухбиррин арада гзафни-гзаф муаллимвилин пеше хкянавайбур ава. Им са кIусни тажубардай делил туш, гьикI хьи, асул кеспи акьалтзавай несилриз чирвилерни тербия гунихъ галаз алакъалу авунвайбуруз чпин насигьатарни фикирар периодикадин куьмекдалди гегьенш къатарал агакьариз кIан жезва…
Гзаф йисара “Лезги газетдихъ” галаз сих алакъа хвейи ва исятдани багъри газетдин вафалу дустарикай сад Мегьарамдхуьруьн райондин Советский хуьре яшамиш жезвай муаллим, РФ-дин журналистрин Союздин член Ферид Эфендиевич Вагьабов я. Журналистикадиз ам гьеле мектебда кIелзавай чIавуз атана.
Эхиримжи вахтара ада къелем кьериз-цIаруз гъиле кьазва. Идан себебни яшлувал я. Амма, чаз чизвайвал, газетдин гьар цIар ада дикъетлудаказ кIелзава. Идан гьакъиндай ада алай йисуз “Лезги газетдин” редакцияди кьиле тухвай Ислам диндиз талукь конкурсда 3-чка кьуни шагьидвалзава.
Инал чна хъсан мухбирдикай, лайихлу муаллимдикай куьруь ихтилат авунихъ чинебан са сирни авач — алатай вацра ада 80 йисан юбилей къейдна.
Ф.Вагьабов 1941-йисан 18-июндиз дидедиз хьана. 1965-йисуз ам ДГУ-дин къецепатан чIаларин факультетдик экечIна. Пуд лагьай курс куьтягьайдалай кьулухъ, гьа са вахтунда Пятигорскдин госуниверситетда заочнидаказ кIелун давамар хъувуналди (ДГУ-да заочный отделение авачир), Советский хуьруьн мектебда муаллимвилин кIвалах башламишна.
Ферид Эфендиевич Хуьруьн мектебда къецепатан чIаларин тарсар гайи сад лагьай муаллим я. Муаллимвилин баркаллу кIвалах ада 2014-йисалди давамарна, райондин къецепатан чIаларин муаллимрин МО-дин регьбервални авуна. Ам республикадин лайихлу муаллимдин, зегьметдин ветерандин тIварариз лайихлу хьанва. ЧIехи Гъалибвилин юбилейриз (ам дяведин йисарин аял я), Дагъустандин 100 йис тамам хьуниз талукь ва хейлин маса шабагьрин сагьибди алай вахтунда лайихлудаказ ял язава. Муаллимвилин зегьметдин бегьерлувал субутзавай делилрикай сад ам я хьи, ада тарсар гайи са шумуд ученикдикай къецепатан чIаларин тарсар гудай муаллимар хьанва.
Ф.Вагьабова муьжуьд веледдиз тербия гана, абурухъ чпин хизанар ава.
“Лезги газетдин” редакциядин коллективди Ферид Эфендиевичаз 80 йисан юбилей мубаракзава. Къуй адахъ чандин сагъвални рикIин шадвал хьурай!
К. Ферзалиев
