РД-дин Кьилин везифаяр вахтуналди тамамарзавай Сергей Меликова гьукумдин органрин, муниципальный тешки­латрин регьберрихъ галаз регион идара авунин центради (ЦУР) винел акъудай месэлайрай кьиле тухвай совещанидал республикадин мулкара коронавирусдихъ галаз алакъалу яз авай гьаларни веревирдна.

ЦУР-дин регьберди къейд авурвал, ватандашар соцсетрин къейдера коронавирусдиз акси вакцинациядикай мукьвал-мукьвал рахазва. Гзафбуру, вакцинациядин бязи пунктара рапар ядай мумкинвал жезвач лугьуз, арза-ферзе ийизвай дуьшуьшарни жезва.

Сергей Меликова къейд авурвал, гьа­йиф­ хьи, Дагъустанда коронавирусдихъ галаз алакъалу гьалар хъсанвилихъ дегиш жезвач, гьар юкъуз 400 кас кьван начагъ хьайибур азарханайра къаткурзава.

“Тек Махачкъалада гьар юкъуз 300 азарлу малум жезва. Маса районра гьалар­ са кьадар пайгар я лугьузни жеда. Ам­ма районрай меркездиз ва чIехи шегьер­риз начагъбур гъизвай делилни къейд тавуна жедач”, — лагьана региондин регьберди.

ТIугъвалдин вилик пад кьунин серенжемар кьиле тухузвай тегьеррални, арадал­ къвезвай нетижайрални кьилди акъвазна. Малум хьайивал, тайинарнавай къадагъаярни гьисаба такьуна, тIугъвал­дин шартIара кIвалах давамарзавай машгъулатрин комплексар, шад межлисрин за­­лар дуьздал акъудзава. ИкI, 3-4 йикъан къене инсанрин гегьенш къатарин иштираквал авай мярекатар, межлисар кьиле тухвай 7 зал тайинарна.

Ковиддиз акси рапар ягъуникай ихтилатдайла, Сергей Меликова кьетIендаказ къейд авурвал, вакцинаяр пландин бинедаллаз вири пунктарив талукь тирвал агакьарзава.

РД-дин Гьукуматдин Председателдин заместитель Мурад Къазиева хабар гайи­вал, санлай региондив вакцинадин 213 агъзур доза агакьнава, 192 агъзур касди ковиддиз акси рапар янава. Адан гафаралди, вакцинациядин вири пунктар герек тир затIаралди таъмин я.

Вакцинаяр агакьзавач ва абур вири пунктара бес кьадарда авач лугьунин ­ма­лу­матриз баян гуналди, С.Меликова къейд­на хьи, регионди датIана гзаф кьадарда дозаяр агакьарун тIалабзава, амма гьа-къи­къатда ракъурзавайбурун кьадар тIалаб­навай кьадардилай тIимил жезва. Ихьтин гьаларизни килиг тавуна, ада рапар ягъунин еришар ва и рекьяй кьабулзавай серенжемар явашар тавунин патахъай тапшуругъ гана.

Инал рикIел хкин, коронавирус ге­гьеншдиз чкIанвайвиляй Дагъустандин пуд хуьр михьиз агална, карантин тайинарнава. Абурук Акуша райондин Гапшима,  Сергокъала райондин Урахи ва Дербент райондин Мугъарты акатзава.  Эхиримжи хуьре сергьятламишнавай серенжемар 29-июлдалди къуватда амукьда.

Пешекарри тестикьарзавайвал, анжах агьалийрин гегьенш къатари рапар ягъуни, тайинарнавай серенжемрал амал авуни тIугъвал явашаруниз таъсирда.

Ихьтин фикир Махачкъалада кардик квай шегьердин клиникадин 1-нумрадин азарханадин пульмонологиядин заве­дующий М.Мегьамедовадини малумарна. Адан гафаралди, азар галукьна, сагъ хъхьайбуруни, иммунитет мягькемарун па­тал, вирусдиз акси раб ягъун герек я.

“Чи агьалийрик акси таблигъатдин чIа­лахъ жедайбурни пара ква. Амма чIуру, ге­рек авачир малуматар раижзавайбуру хсуси ва маса инсанрин сагъламвал хаталувилик акатуникай фикирзавач… Гье­ле­лиг вакцина пулсуз тирвиляй бязибуру ихтибарзавач, эгер адан кьитвал хьайитIа, ам къецепатан уьлквейрайни маса къачунин къайгъуда жеда”, — лагьана дух­турди.­

Дагъустандин здравоохраненидин министерстводин делилралди, анжах ала­тай гьафтедин муддатда агъзурни вад виш касдик коронавирус акатна. Вирусдикди рекьизвайбурун кьадар артух жезва — алатай гьафтеда 44 кас кьена. Эхиримжи йикъара вирусди жегьил инсанрални гьужумзава.

* * *

Совещанидал Сергей Меликова милли проектар кьилиз акъудунин месэлани кьилди веревирдна. Къейд авурвал, тайин­ рекьериз чара авунвай такьатар ишлемишунин, пландик кутунвай крар тамамарунин еришар яваш я.

Мисал патал ада “Демография”, “Об­ра­зование”, “Хатасуз ва ерилу рекьер” проектар уьмуьрдиз кечирмишун патал ку­тIуннавай икьраррин процентар 20-даз, 25-даз ва 50-даз барабар тирди малу­марна.

«Лезги газет»