Алатай гьафтеда Махачкъаладин “Россия — Зи тарих” паркунин пуд лагьай мертебада Къенин йикъахъ галаз кьадай пара метлеблу мярекат кьиле фена. Анал Сулейман-Стальский райондин хуьрер, мулкар вилик тухуниз, аваданламишуниз талукь мастер-план арадал гъуникай рахунар авуна. Малум хьайивал, мастер-план туькIуьрунал Москвадин «Атлас» компаниядин пешекарар машгъул жеда. И компанияди Дербент шегьер вилик тухуниз талукь мастер-планни туькIуьрзава.
Залда кIватI хьанвайбуруз Сулейман-Стальский райондин гуьрчег ва надир чкайрикай видеофильм къалурна. Чка-чкадилай ванер агакьзавай: “Икьван иер чкаярни авайди яни ана?” “Багъларин гуьзелвал вуч я!” “Туризмдин маршрутар ачухдай гуьрчег чка я”.
Райондин кьил Нариман Абдулмуталибова Дагъустандин чIехи районрикай сад тир чкадин тарихдикай куьрелди ихтилатна ва давамарна:
— Къенин мярекат чун патал лап важиблуди я. Мастер-план туькIуьруни чаз хейлин хилерай виликди физ, хуьрер аваданламишиз, гзаф месэлайрив цIийикIа эгечIиз куьмекда. “Атлас” компаниядин пешекарри чи агьалийрихъ галаз сих алакъада аваз кIвалахда, абурун фикирар чирда, теклифрикай менфят къачуда. Гьа са вахтунда бизнес-сообществодихъ галазни меслятарда, абурун фикирар чирда. Россиядин майданда им надир проект я. Гьеле хуьрерин агломерацияр патал икьван гагьда ихьтин мастер-планар туькIуьрнавайди туш. И рекьяй чун сад лагьайбур жезва ва зун инанмиш я, “Атлас” компанияди ва харжар вичин хивез къачунвай мергьяматлувилин “УМУД” фондуни чи район патал менфятлу крар ийида. Абурун зегьметдин нетижа яз, район чи агьалияр ва туристар патал къулай чкадиз элкъведа.
Зун “Атлас” компаниядин генеральный директор Александра Сытниковадихъ галаз гуьруьшмиш хьана ва ада лагьана:
— Чаз Сулейман-Стальский район пара бегенмиш хьана. Адахъ гзаф рекьерай виликди фидай, район абад, жемят агьваллу ийидай пара рекьер, мумкинвилер ава. Хуьрер аваданламишунни гьа иник акатзава. Россияда 150 агъзур хуьр ава. Гьайиф хьи, икьван гагьда са хуьруьз кьванни мастер-планар авунвач. Хуьрера яшамиш жезвайбурузни шегьердин хьтин къулай шартIар тешкилун алай аямдин истемишун я. Чна мастер-план туькIуьрзавай Кьасумхуьр, Агъа СтIал, Кьулан СтIал, Вини СтIал, Курхуьр, санлай къачурла, са шегьердиз ухшамиш я. Анра шегьердин къайдаяр, шартIарни арадал гъун лазим я. Чи планди райондиз уьлкведин майданда лайихлу дережадиз экъечIдай мумкинвал гуда. Чун районэгьлийрилай пара рази я. Чна абурухъ галаз хушдиз кIвалахда, герекзамай кьван йикъара винидихъ тIвар кьунвай хуьрера яшамишни жеда. Райондиз ва хуьрериз федеральный программайра иштиракдай мумкинвални ачух жеда.
Райондин, “УМУД” фондунин ва “Атлас” компаниядин векилриз санал кIвалахунин икьрардал къулар чIугун РД-дин архитектурадин, эцигунрин комитетдин председатель Незир Гьуьсейнова, Александра Сытниковади, “УМУД” фондунин председатель Савин Велиева ва масабуру тебрикна ва уьлкведани, республикадани сифте яз гъиле кьазвай кардихъ агалкьунар хьун алхишна.
Нариман Ибрагьимов
