“Россети Северный Кавказ” ПАО-ди алай йисуз Дагъустан Республикадин энергообъектрал кьилиз акъудун фикирдик квай ремонтрин кIвалахриз чара ийидай финансрин кьадар 656 миллион манатдив агакьдалди артухардай къарар кьабулнава.
2021-йис патал фикирда кьунвай такьатрин виликан кьадардив гекъигайла, алава яз программадик кухтунвай финансри 268 млн манат тешкилзава. Харж авун фикирда кьунвай такьатар артухарун и хиле гьялна кIанзавай месэлаяр гзаф хьунихъ галаз алакъалу я.
“Алава такьатар Дагъустандин районра авай подстанцияр ва электроэнергия агакьардай сетар республикадин электросетевой комплекс алай аямдин истемишунрив кьадайвал туькIуьр хъувунин программадин сергьятра аваз бинедилай, яни капитальный ремонт авуниз харжда”, — хабар гузва идарадин информациядин къуллугъди.
Къейдзавайвал, ида сетрал виридалайни еке гуж акьалтзавай сезондин вахтунда агьалияр электроэнергиядалди дурумлудаказ, атIунар авачиз таъминардай мумкинвал гуда.
“Санлай къачурла, “Россети Северный Кавказ” дестедин ремонтрин программа финансралди таъминаруниз винидихъ лагьанвай дегишвилер кухтурдалай кьулухъ алай йисуз 2,6 миллиард манат (алатай йисандалай 9,5 процентдин гзаф) рекье твада”, — лугьузва малуматда.
«Лезги газет»
