Алатай гьафтеда РД-дин Кьилин везифаяр вахтуналди тамамарзавай Сергей Меликов Москвада РФ-дин эцигунрин ва ЖКХ-дин министр Ирек Файзуллинахъ галаз гуьруьшмиш хьана.
Абуру яшамиш жедай кIвалерин эцигунрикай, инженервилин инфраструктура еримлу авуникай, жемиятдин мулкар абадуникай ихтилатна. Гуьруьшдин вахтунда асул фикир Дагъустандин агьалияр хъвадай ерилу целди таъминарунин, чкIизвай чкайра яшамиш жезвайбур масанра ацукьарунин месэладиз гана.
Алай йисуз Дагъустанда “Михьи яд” проектдай Къизляр, Хасавюрт ва Хунзах райондин Батлаич хуьр целди таъминарунин система цIийи хъийида.
Ирек Файзуллина къейд авурвал, регион хъвадай михьи целди таъминарун патал комплекснидаказ эгечIун чарасуз я. Идахъ галаз алакъалу яз, РД-дин талукь тир министерстводиз тапшуругъар ганва.
Вичин нубатда Сергей Меликова веревирд авур хилерин важиблувал квекай ибарат ятIа лагьана.
“Чи эвелимжи нубатдин везифайрикай сад халкь хъвадай ерилу целди таъминарун я. Бюджет тестикьардайла, чна гьар са муниципалитетда и месэла гьялунин такьатар фикирда кьада”, — къейдна С.Меликова.
«Лезги газет»
