Кьурагь районда кардик квай “Кьурагь дагълар” хордин коллектив Кьиблепатан Дагъустанда гзаф сейли я. Чкадин телевиденийрин каналрай заз и коллективди тамамарзавай манийрихъ ва милли авазрихъ яб акалун са шумудра кьисмет хьана.
17-июндиз къадим Дербент шегьерда “Лезги газетдин” 100 йисан юбилейдихъ галаз алакъалу яз тухвай лезги прессадин сад лагьай фестивалда ва 25-июндиз Кьасумхуьрел лезгийрин къагьриманвилин “Шарвили” эпосдин суварин мярекатда заз “Кьурагь дагълар” хордин коллективдихъ галаз мукьувай таниш жедай мумкинвал хьана.
— “Кьурагь дагълар” хордин коллектив 1975-йисуз тешкилайди я, — лагьана чаз хордин солистка, Кьурагь районда кардик квай ЦТКНР-дин директор, РД-дин культурадин лайихлу работник Кевсер Фейзуллаевади. Гьа йисалай къенин йикъалди коллективдин иштиракчияр са шумудра дегиш хьана, чIехи несилдин векилар жегьилри эвеззава. Чи дуствилин коллективди халкьдиз медениятдин жигьетдай къуллугъ авунин баркаллу кар давамарзава. Агалкьунриз килигна “Кьурагь дагълар” хордиз 3 йисан вилик “Халкьдин коллектив” лагьай тIварни ганва.
Кьурагь дагълар гуьзел ва такабурлу я, райондин агьалияр — бажарагълу. Хордин коллективни чпиз тIебиатди кьетIен пай ганвай устадрикай ибарат я. КьетIен бажарагъдин, ажайиб сесинин сагьиб тир манидар Садулагь Таибов хордин коллективдин художественный руководитель, солист я. Ам Дагъустан Республикадин культурадин лайихлу работник, республикадин фестивалрин ва килигунрин лауреатни я.
“Кьурагь дагълар” хордин солистар тир Масан Асланован, Фарида Жалиловадин, Мадина Муртузалиевадин, Наби Таибован, хордин оркестрдин руководитель Муртуз Муртузалиеван устадвиликайни хуш келимаяр лугьуз жеда. Санлай къачурла, “Кьурагь дагълар” коллектив 12 касдикай ибарат я.
Хордин концертрин репертуар жуьреба-жуьре ва девлетлу я. Кевсер Фейзуллаевади ва Садулагь Таибова чаз лагьайвал, хорди чIехи пай халкьдин манияр тамамарзава. Чкадин авторри кхьизвай маниярни гзаф я.
“Кьурагь дагълар” хордин коллективди районда ва Кьиблепатан Дагъустанда тухузвай медениятдинни шадвилерин мярекатра, республикадин дережадин килигунра, фестивалра иштиракзава, анра агалкьунар къазанмишзава.
Чаз алава хъувурвал, алай вахтунда хордин коллективди республикадин меркезда концертдин программа къалуруниз гьазурвилер аквазва.
Хазран Кьасумов
