“Лезги газет” хтайвалди, за сифте нубатда М.Жалилова кхьизвай “Веревирдер” кIелзава, ахпа амай макъалайриз килигзава. Гьа зи рикIе ва фикирда авай крарикай кхьизва журналистди. Аферин. 14-нумрада М.Жалилова кхьенвай “Тербия — кицIинди, къилих…” веревирдер кIелайла, завай акъвазиз хьанач. Ада зун къелем кьуниз мажбурна. Анжах за чи жегьилрин тербия гьинай къвезватIа, гьадакай кхьида.
1959-йисуз чи дах, муаллим яз, куьгьне Чахчарин хуьре хизанарни галаз амукьна, 5-классда кIелиз зун агъа Чахчал атана. Ина зун Сулейман буба-дин (дахдин ими) кIвале хьана. Адаз урус, азербайжан ва туьрк чIалар чидай.
И хуьре эквер авачир. Сулейман бубадиз батарейрал кIвалахдай приемник авай. Йифди гьадахъ яб акализ, муькуь кIвале жедай. Пака кимел фена, хуьруьнбуруз икI лугьудай: “Жемятар! Инлай кьулухъ дуьньяда вуч къалмакъал, дяве хьайитIани, Америка себеб яз жеда. И хуьре хьайи чIуру кIвалахар зал аватда”. (Вични зарафат квай инсан тир).
А вахтунда чаз Америкадикай са затIни чизвайди тушир. 1966-1969-йисара зун армияда Узбекистанда, Чирчик шегьерда хьана. За аэродромдал радиомеханик яз къуллугъна. Радиотехника хъсандиз чидай гадаяр аваз, абуру са приемник туькIуьрна. Узбекистанда вахт чинилай 3 сятдин вилик квай. Йифен сятдин 11-даз за Махачкъаладай лезги концерт кьуна, батальондиз зенг авуна, ана авай лезги гадайрив концертдихъ яб акализ тадай. Чун радиостанцияда 2 кас дежурствода жедай. ТIуьнни гьаниз гъизвайди тир. Йифиз за “Голос Америки”, “Немецкая волна”, “Би-би-си” ва маса каналрихъ яб акалдай. А вахтара ахьтин передачайрихъ яб акалун къадагъа тир. Гьа вахтунда заз Сулейман бубадин гафар тестикь хьана. За фикир гайила, а каналра кIвалахзавайбурун чIехи пай, чи уьлкведай катна, чун маса гузвай “алчахар” тир. Абуру гьамиша чи гьукумат (СССР) жакьвазвай, чакай хъсан патахъ садрани рахадачир. Чи Сулейман буба гьахъ тир кьван!
Гьабиб Гьабибов,
Чахчар-Къазмаяр
