И мукьвара Ахцегь райондин Гъуьгъвезрал “Честь имею” лишандик кваз Кьиблепатан Дагъустандин спортдин къугъунар — ачух турнир кьиле фена. Абурун тешкилатчи ахцегьви — меценат Нариман Гъазалиев тир. Спортдин мярекатдин багьа мугьманрин арада Ахцегь, Докъузпара ва Рутул районрин военный комиссар Рафик Мегьамедов, Дагъустандин Муфтийдин Кьиблепатан территориальный округда (ЮТО) тамам ихтиярар ганвай векил Хусейн Гьажиев, Хуьруьгрин хуьруьн советдин кьил Загьидин Сулейманов, “Ватанпересар” ДРОО-дин векил Давуд Исаев, “Universal Fighter” клубдин кьилин тренер Осман Гьажимусаев, Ахцегь райондин жегьилрин парламентдин председатель Рустам Шакиров, райондин просвещенидин отделдин регьбер Узаир Шамилов ва масабур авай.
Сир туш, и жуьредин мярекатри акьалтзавай несил ватанпересвилин руьгьдаллаз тербияламишунин карда еке роль къугъвазва. Акъажунра Кьиблепатан Дагъустандин районрай тир, армиядин жергейриз къуллугъиз фидай яшара авай жегьилри спортдин милли жуьрейрай чпин устадвал къалурна. Кьилди къачуртIа, ана Докъузпара райондин администрациядин спортдин, жегьилрин крарин ва туризмдин отделдин начальник Агъашериф Агъаширинован регьбервилик кваз са жерге спортсменрини (шикилда) иштиракна ва хъсан нетижаярни къазанмишна. Турнирда къалурай устадвилиз килигна, Докъузпара райондай тир спортсменри — Азим Багъирова — 1, Сердер Гьажиева — 3 (200 метрдиз чукурунай); Адил Ремиханова — 2 ва Абдуллагь Муталибова — 3 (пут яргъаз гадарунай); Абдул Гьасанова — 2 (акъвазай чкадилай яргъаз хкадарунай); Сердер Гьажиева (брусрал отжиманияр авунай) 2-чкаяр кьуна. ЦIил ялунай райондин команда 2-чкадиз лайихлу хьана.
Ачух турнирда гъалибвал къазанмишай вири спортсменар гьуьрметдин грамотаяр ва пулдин пишкешар гуналди къейдна. Абур Хуьруьгрин хуьруьн советдин кьил З.Сулейманова ва спортдин школада армрестлингдай тренер Исамудин Шагьэмирова тебрикна ва пишкешар вахкана.
«Лезги газет»
