Лезгийрин бажарагълу художникрикай сад Алияр Алимирзоевич Алимирзоев я. Ам 1961-йисуз Азербайжандин КцIар районда дидедиз хьана. 1981-йисуз А.Азимзадедин тIварцIихъ галай Азербайжандин гьукуматдин художественный училищедин живописдин факультет акьалтIарна.
Зун адан яратмишунрихъ галаз сифте яз интернетда таниш хьана. Ада чIугвазвай шикилри садни гьейранар тавуна тадач.
Адан кIвалахар Азербайжандин художникрин Союзда, Азербайжандин медениятдин министерствода, Бакуда кардик квай, Р.Мустафаеван тIварцIихъ галай Азербайжандин гьукуматдин изобразительный искусстводин музейда, РФ-дин медениятдин министерствода, Россиядин художникрин Союзда (Москва), гьукуматдин Третьяковский галереяда (Москва), Австриядин меркезда авай “Альбертино” музейда, Даниядин Аденс шегьердин музейда ава.
Алияр Алимирзоев вичин кIвалахар-картинкаяр муьштерийри гзаф маса къачузвай художникрикай сад я. Адан бажарагъди арадал гъанвай итижлу картинкаяр Россиядин, Китайдин, США-дин, Туьркиядин, Сербиядин, Кореядин, Польшадин, Индонезиядин ва хейлин маса уьлквейрин вилик-кьилик квай ксарин, карчийрин хсуси коллекцийра аваз хьунини адан бажарагълувилин дережадин гьакъиндай шагьидвалзава. Эхиримжи йисара ада вичин кIвалахрикай агъзурдалайни гзаф маса ганва. Чавай ада чIугунвай шикилри дуьнья гуьрчегарзава лагьайтIани жеда.
Алияр Алимирзоевичан “Фениксы” кIвалах 2004-йисуз Парижда 200 уьлкведин художникрин иштираквал аваз кьиле фейи вири халкьарин выставкада Гран-при премиядиз лайихлу хьана.
27 йисан яшда авай жегьил художник яз, СССР-дин художникрин Союздиз кьабулунни адан еке агалкьунрикай я. Москвада жегьилрин ва спортдин центрада выставка кьиле тухвайдалай кьулухъ адаз СССР-дин художникрин Союзди пуд йисан стипендия тайинарнай.
Алатай асирдин эхирра машгьур художник Расим Бабаева чи ватанэгьлидикай икI лагьанай: “Алияра искусствода мумкин тир вири крар авунва. Ада тавунвай мад са карни амач”.
2006-йисуз Азербайжандин президентдин къарардалди А.Алимирзоеваз Азербайжандин лайихлу художниквилин тIвар гана.
Пешекарри адан яратмишунриз чIехи къимет гузва. Адаз вичин кьетIен алем, устадвал ава. Магьирвилелди вичин бажарагъ ишлемишзавай художник тирвиляй ам еке дережайривни агакьнава.
А.Алимирзоева Францияда, Кореяда, Германияда, США-да ва масанра кьиле физвай дуьньядин хейлин симпозиумра, выставкайра иштиракзава. Чаз ада яратмишунри мадни кьакьан кукIушар муьтIуьгъарна кIанзава.
К.Ферзалиев
