Германиядин Дортмунд шегьерда  кьуршахар кьунай  Европадин кIвенкIвечивал патал 21 йисал къведалди яшара авай спортсменрин арада акъажунар кьиле фена. Ана Россиядин, Азербайжандин, Украинадин, Гуржистандин, Эрменистандин, Белоруссиядин викIегь жегьил пагьливанри иштиракна. Шадвилелди а кардикай мадни хабар гуз кIанзава хьи, кесерлу и акъажунра чпин устадвал къалурай ва кIенкIвечивилиз лайихлу хьайибурун арада вичин ери-бине Ахцегьай тир кьегьал, алай вахтунда Азербайжандин командадин патай экъвечIзавай Жабраил Гьажиевни авай. 

ИкI, азаддаказ кьуршахар кьунай 74 кг-дал къведалди заланвал авайбурун арада кьиле тухвай бягьсина Туьркиядай тир Гарип Танер адаз 12:2 гьисабдалди кумукьна.

РикIел хкин: дуьньядин кесерлу майданра Ж.Гьажиева вичин устадвал идалай виликни къалурнай. ИкI, алай йисан майдиз Кеферпатан Македониядин Скопье шегьерда Европадин кIвенкIвечивал патал акъажунра 23 йисал къведалди яшара авай жегьилрин арада ада (ва грекринни римлуйрин жуьреда кьуршахар кьунай машгьур чи мад са спортсмен Анвар Аллагьярова)  къизилдин медаль къазанмишнай. А чIавуз 70 кг-дин заланвал авайбурун арада финалда чи ватандашдихъ галаз бягьсиниз Молдовадай тир Н.Грахмез экъечIнавай. Сад хьтин гьисабдалди (5:5) акьалтIай бягьсинай судьяйри, бягьсерин ери ва  устадвал фикирда кьуналди, гъалибвал Ж.Гьажиеваз ганай.

Рагнеда  Рамалданова