Чна идалай виликни хабар гайивал, 3-июлдиз Махачкъалада республикадин “Дагъустандин машмашар” фестиваль кьиле фена ва адан сергьятра аваз тешкилай мярекатра Дагъустан Республикадин Кьилин везифаяр вахтуналди тамамарзавай Сергей Меликова иштиракна.
СтIал Сулейманан тIварунихъ галай паркуна ва адан патав гвай Пушкинан тIварунихъ галай куьчеда кьиле фейи фестивалда Дагъустандин 30 райондай тир хуьруьн майишатдин суьрсет гьасилзавай агьалийри иштиракна. Мярекатдин сергьятра аваз хуьруьн майишатдин суьрсетдин ярмарка ва республикадин машмашар гьасилунал машгъул муниципалитетрин кьилди-кьилди майишатрин майданар ачухнавай.
“Къе чна “Дагъустан — Россиядин машмашрин макан” фестиваль кьиле тухузва. Эгер республикадиз йисалай-суз гзаф къвезвай мугьманрихъ яб акалайтIа, и тIвар адаз гьахълудаказ ганва. Къенин юкъуз машмашрикай гьазурзавай суьрсет Дагъустандин халисан ярж ва Россиядин Федерациядин сергьятра виридалайни хъсанди я лагьайтIа жеда. Чна и мярекат кьиле тухунин себеб сифтени-сифте машмашар гьасилунал машгъул вири районриз чпин суьрсет раиж ийиз куьмек гун я”, — лагьана фестиваль ачухдай мярекатдал Сергей Меликова.
Региондин Кьили къейд авурвал, къенин юкъуз вилик акъвазнавай четин месэла машмашар гьасилунихъ ваъ, абур хуьнихъ ва маса гунихъ галаз алакъалу я. Ада и месэла яваш-яваш гьялдайдахъ инанмишарна. Къейд авурвал, хуьруьн майишатдин и хел еримлу авун ва сортарин ери хъсанарун патал дуьз шартIар тешкилда.
“И фестиваль эхиримжиди туш, чаз адакай адетдинди ийиз, гьакIни маса емишар ва майваяр гьасилзавайбуруз фикир гуз кIанзава. Гьелбетда, тIугъвалдихъ галаз алакъалу гьалар эхирдал атанайтIа ва чавай жуьреба-жуьре ярмаркаяр кьиле тухуз, агьалийриз чпи гьасилзавай шей маса гудай шартIар тешкилиз хьанайтIа кIандай”, — алава хъувуна ада.
Гуьгъуьнлай республикадин Кьил гьар жуьре районрай гъанвай суьрсетдихъ галаз таниш хьана ва чкадин лежберрихъ галаз ихтилатарна, абурун кIвалахда гьалтзавай месэлайрикай рахана.
“АкьалтIай четин месэла гьасилнавай суьрсет чи базарра маса гунихъ галаз алакъалу я. Гьаниз килигна, республикадин хуьруьн майишатдин ва недай суьрсетдин министрдихъ ва Гьукуматдин Председателдин заместителдихъ галаз санал чна базарра къайда твадай къарар кьабулнава”, — лагьана С.Меликова. Ада гьисабзавайвал, базаррай са шейни арадал тегъизвай, гьа са вахтунда вижевайдаказ къазанмишзавай ва идалди, чпин зегьмет серфна, суьрсет гьасилзавай лежберрин къазанжияр тIимиларзавай арачияр квадарна кIанда.
Фестивалдикай рахадайла, С.Меликова къейд авурвал, Дагъустандин лежберриз куьмек гун патал суьрсет маса гуниз, сетевой тешкилатрихъ, гьа жергедай яз мукьварал регионда кIвалахиз башламишдай “Магнит” туьквенрихъ галаз алакъаяр тайинаруниз талукь са жерге къарар кьабулун лазим я.
“Абурухъ галаз чна гьар са туьквенда Дагъустандин суьрсет гьасилзавайбур патал дезгеяр хьунин месэладал кIукI гъида. Сетрин къурулушда ихьтин отделар хьуни чаз — яржар тир шейэрин арада чка кьадай, гьакIни республикадин лежберриз чпин метягь и сетдин куьмекдалди маса регионриз акъуддай мумкинвал гуда”, — лагьана ада ва идалай гуьгъуьниз маса сетрихъ галазни веревирдер ийидайди къейдна.
Идалайни гъейри, Сергей Меликова, хуьруьн майишатдин ихьтин ярмаркаяр гележегдани тешкилун ва метягь санай масаниз тухун патал, эксперимент яз, районриз — рефрижераторар галай автотехника, РД-дин хуьруьн майишатдин ва недай суьрсетдин министерстводиз лагьайтIа, — палаткаяр, кассовый аппаратар ва лазим тир маса шейэр маса къачун теклифна.
«Лезги газет»
