ЦIийи пособияр. КIвачел залан хьуникди виликамаз учетда акъвазнавай, гьакIни 8 йисалай 17 йисал кьван яшара авай аялриз текдаказ тербия гузвай дишегьлийриз пулдин такьатар гуда. Абур 1-июлдилай госкъуллугърин порталда тайинариз жеда.
Федеральный чешмейри къейдзавайвал, дарда гьатнавайбуруз куьмек гун патал гьукуматди 46,6 миллиард манат чара авунва. Кьилди къачуртIа, кIвачел залан дишегьлияр патал 10 миллиард манат: аял хадалди, дишегьлидивай гьар вацра тахминан 6300 манат къачуз жеда (регионда тайинарнавай яшамиш хьунин агъа кIанин кьадардин са пай). 36 миллиард манат ялгъуз диде-бубайриз куьмек гуниз серфда: гьар вацра абурал юкьван гьисабдалди 5500 манат гьалтда. Алай йисуз миллиондилайни гзаф аялрин диде-бубайриз пулдин такьатар гудайвал я.
ПIапIрусар мад багьа жеда. ПIапIрусрин са кьватидин кура-кура маса гунин агъа кIанин къимет 107 манатни 78 кепек жеда. Идалайни гъейри, маркаяр алачир пIапIрусар туьквенра амукьдач. Иник адетдин ва къалияндин тенбекарни акатзава. Маркаяр ягъунин чарасузвал алатай йисуз малумарнай, амма алверчийривай 1-июлдалди идалай вилик къачунвай пIапIрусар ва тенбек квай маса затIар маса гуз жезвай.
Алай йисуз тенбекдин акцизар 20 процентдин хкажна. Эгер икьван чIавалди пIапIрусрин са кьвати юкьван гьисабдалди 120 манатдай тиртIа, 1-июлдилай адан къимет тахминан 140 манат жеда.
Госкъуллугъчийриз къецепатан гражданство къадагъа ийида. Къанунрик кухтунвай цIийи дегишвилерал асаслу яз, госкъуллугъдал алай россиявийриз къецепатан уьлквейрин гражданство хьун къадагъа авунва. Абур гьамиша къецепатан уьлквейра яшамиш жедай ихтиярар ава лагьай документрикай магьрумда.
Улакьрин техосмотр. Маса уьлквейрай хкизвай ишлемишнавай улакьрин технический гьалар ахтармишунин кар 1-июлдилай мягькемардайвал я. Ахтармишунин кIвалахрин са пай икьван чIавалди шикилдай ийизвай. Гила ихьтин машинар анжах синагъ авунин лабораторийра ахтармишда. И серенжемар тюнинг авунвай машинризни талукь я.
«Лезги газет»
