Эхиримжи йисара, гьар сеферда марф-жив къвайила, гар акъатайла ва гьакI секин чIавузни эквер хкахьиз, районэгьлийрин электроприборар къайдадикай хкатзавай, къулайсуз гьалар арадал къвезвай. И жигьетдай абонентрин, иллаки Ахцегь вацIун дередин агьалийрин (абур суткайралди эквер авачиз амукьай вахтар хьана) патай гьахълу шикаятар, наразивилер жезвай.
2020-йисан августдилай Ахцегь райондин электросетрин (РЭС) начальниквиле Гьасанов Мамед-Гьуьсейн тайинаруникди ина хъсанвилихъ аквадай хьтин дегишвилер малум я: ЛЭП-дин шалманар, симер дегишарзава, трансформаторар ремонтзава… Нетижада халкьдин патай шикаятар саки амач, мумкин тир ЧП-ярни эквер хкатунин бязи дуьшуьшар, энгел тавуна, арадай акъудзава. Сагърай лугьузва инсанри.
— Разивилелди къейдин,- ихтилатзава Мамед-Гьуьсейн Гьасанова, — ПАО “Россети Северный Кавказ” компанияди Самур дередиз, кьилди къачуртIа, Ахцегь, Докъузпара, Рутул районриз кьетIен фикир гузва. Месела, алатай хъуьтIуьз гьазурвал акун яз, Хинез, Фияз, Гутумиз, Смугъулиз фенвай 10 кВ кьакьан напряженидин токдин хейлин шалманарни симер (ЛЭП) дегишарна, кватнавай симер чIухгуна, мягькемарна. Санлай са гьа и участокда цIийи 61 шалман акIурна, 12 километрдин мензилда Ас 25 симер Ас 35 жуьрединбуралди эвезна. И кIвалахар, эвелимжи нубатда, чи карханадин коллективда зегьметдин низам-къайдадал гуьзчивалунин, устIарринни фялейрин пешекарвилин дережа хкажунин ва абурув зегьметдин хатасузвал хуьнин къайдайрал амал ийиз тунин нетижада къазанмишиз жезва.
Гъилевай йисуз чи вилик районда куьгьне хьанвай кьван вири шалманар дегишарунин, 112 шалман туькIуьр хъувунин ва 6,5 километрдин мензилда ЛЭП-ар тамамдиз ремонтунин везифа ква. И кIвалах активнидаказ кьиле тухузва. Гьелелиг 30 шалман эцигнава, къайдадай акъатнавай трансформаторар ремонтзава. И месэлайра чаз, гьелбетда, райондин руководстводин, хуьрерин администрацийрин патайни куьмек ава, пара кьадар сагърай! Хиве кьазва хьи, районэгьлияр ерилу электроэнергиядалди дурумлудаказ таъминарун патал чун жезмай кьван алахъда.
Дашдемир Шерифалиев
