Коронавирусдихъ инсаф авач. Эхиримжи йикъара и фендигар азардин камар мад йигин хьанва. Пешекарри къейдзавайвал, тIугъвалдин цIийи лепе къарагънава. И жигьетдай Дагъустанда авай гьалар къвердавай къизгъин жезва. Республикадин здравоохраненидин министерстводин делилралди, алатай гьафтеда Дагъларин уьлкведа 797 касдик коронавирус акатна. Гьайиф къведай кар ам я хьи, духтурривай тIугъвалдин къармахра гьатай вирибуруз куьмек гуз жезвач. И йикъара коронавирусдик чи арадай газетдин вафалу дуст, физикадинни математикадин илимрин кандидат, гьикаятчи, жемиятдин векил Мариф Жамединович Къадимов акъатна. Адан 67 йис тир.
М.Ж.Къадимов 1954-йисан 26-мартдиз Азербайжан Республикада дидедиз хьана, аял вахтар чIехи бубайрин ватанда — Чеперин хуьре акъатна. 1971-йисуз къизилдин медалдалди мектеб акьалтIарай ам МГУ-дик экечIна. Вуздилай кьулухъ аспирантурада кIелна, агалкьунралди илимрин кандидатвилин диссертация хвена. Жуьреба-жуьре йисара Г.М.Кржижановскийдин тIварунихъ галай ДагЭНИН-да, РД-дин зегьметдин министерствода кIвалахна, ДГТУ-да, ДГУ-да ва республикадин маса вузра тарсар гана. 2000-йисуз М.Къадимова информациядин технологияр вилик тухунин месэлайрал машгъул “Интех-Софт” компания арадал гъана.
Алимди лезги халкьдин жемиятдин уьмуьрдани активнидаказ иштиракзавай. Махачкъалада кьиле физвай лезгийрин саки гьар мярекатда Мариф Къадимов аквадай. Мергьяматлувилин “ЛЕКИ” фонд арадал гъуник, и тешкилатдин кIвалах вилик финикни ада чIехи пай кутуна.
Азад вахт чи ватанэгьлиди эдебиятдиз бахшзавай. “Лезги газетдиз” са шумудра адан къелемдикай хкатай гьикаяяр, куьруь очеркар акъатнай. Алатай йисуз М.Къадимован эсеррикай ибарат тир кьве ктабдиз (сад — урус, муькуьди — лезги чIаларал) дуьнья акуна. РикIел хкин, ктабрин презентация са шумуд гьафте идалай вилик “Лезги газетдин” редакцияда кьиле фенай.
Мариф Къадимов хайи чилихъ, чIалахъ рикI кузвай ватанпересрикай сад тир. Адакай жегьилриз — хъсан насигьатчи, вичелай яшдиз чIехибуруз къайгъудар хва хьана. Гьакьван къени, еке сабур авай, вичикай садан кефини тахадай, агъайна, заха инсан тир ам. Гьахьтинди яз ам чи рикIерани амукьда.
“Лезги газетдин” редакциядин коллективди Мариф Къадимов рагьметдиз финихъ галаз алакъалу яз, адан хизандиз, вири мукьва-кьилийриз, ярар-дустариз башсагълугъвал гузва.
«Лезги газет»
