25-июндиз Сулейман-Стальский райондин Кьасумхуьруьн культурадин дараматдин вилик квай майдандал лезги халкьдин къагьриманвилин “Шарвили” эпосдин 21-сувар шад гьалара кьиле фена. Ана Сулейман-Стальский райондин кьил Нариман Абдулмуталибова, РД-дин Халкьдин Собранидин депутат Гьамидуллагь Мегьамедова, мергьяматлу “Умуд” фондунин векил Савин Велиева, райондин собранидин депутатри, интеллигенциядин, общественный тешкилатрин ва СМИ-рин векилри, жемятди иштиракна.

Мярекат кьиле физвай майдан суварин  къайдада безетмишнавай. Зуьрнечийрин дестеди тамамарзавай милли авазрикди инсанар кьуд патахъай суварин майдандал кlватl жезва.

Культурадин дараматдин фойеда жуь­реба-жуьре выставкайри — “Лезги халкьдин къагьриманвилин “Шарвили” эпос”, “Авахьа, дидедин чlал”, “Лезги пресса. Тарих ва алай аям”, “Культурадин центр “Куьредин ярар”, “Стlал Сулейманан ктабар” ва гьакlни Дагъустандин маса писателринни шаиррин ктабри жемят чпел желбзава. Майдандин къваларив художник Низами Агьмедханован гъили чlугун­вай шикилрин, хъенчlин къапарин устIа­рар тир Шакир Шерифован ва К. Керим­ханован, “Шарвили” эпосдин бинедаллаз аялри чlугунвай шикилрин ва маса выставкаяр кардик ква, инсанрин цIиргъ абурал эл­къвезва. 70 литр физвай чай ргазвай са­мовардин патав кlватl хьанвайбуруз Кьасумхуьруьн администрациядин работник Раизат Бабаевади чай хъун теклифзава. Са тlимил а патал хьиз кIанзавай гьар садаз къайи ятар пулсуз гузва.

Мярекат кьиле тухузвай машгьур тамада  Ярагьмед  Ярагьмедова  тебрикдин гаф  Нариман  Абдулмуталибоваз  гузва.

— Халкьдин къудрат, уьтквемвал, дири­башвал, мердвал къалурзавай лезги­ халкьдин къагьриманвилин “Шарвили” эпосдин 21-сувар къе чна шад гьалара къейдзава, — лагьана ада. — Им гьакlан мес­эла туш. Жуьреба-жуьре ихтилатар ийизвай инсанарни амазма. Лагьана кlанда хьи, Шарвили ни ятlани, вуч ятlани лагьа­на­, туькlуьрнавай инсан туш. Тарихдин де­лилри къалурзавайвал, ам гьакъикъатда хьанва. Халкьдин сиверай сивериз, несилрилай несилрал физ, адан тарих кьве агъзур йисав агакьнава ва къе чна и кардал дамахни ийизва.

Чи къадимлувал къалурун патал, Шар­вилидикай сивин эсерар вири кlватlна, чlе­хи эпос арадал гъанва. Эпосдикай рахадайла, литературадин и чlехи эсер чав агакьарнавай Забит Ризванован, Байрам Салимован, Агьед Агъаеван тlварар кьуна кlанда. “Шарвили” эсердиз илимдин веревирдер, баянар ганвай алимар — Гьажиев, Гъаниева, Агъаширинова ва масабур гьамиша чи рикlел алайди я.

“Шарвили” сувариз вичин эгьмият, метлеблувал ава, “Шарвили” эпосди чи халкь сад ийизва. Анай чаз чи халкьди чlугунвай зегьмет, тарихда хьанвай вакъи­аяр, Шарвилидин вичин хайи халкьдихъ галаз авай алакъа, чlалан гуьрчегвал, ана къалурнавай чи халкьдин чIехи дережа, къуччагъвал, жуьрэтлувал, викlегьвал, Ватан хуьнин ва кlан хьунин гьиссер аквазва. Гьаниз килигна, кьве агъзур йисав агакьнавай эпос чи акьалтзавай несилрив агакьарна, абур гележегдани эпосдин къаматра авай гьерекатралди, тарихдин ва­къи­айралди тербияламишна кlанда. Эпосдин сувари чи халкь сад ийизва, акьалтзавай несил ватанпересвилин фикиррал желбзава — им чи руьгьдин игьтияж я. Шар­ви­ли чи халкьдин вири я. Яшамишрай Шарвилидин руьгь ва ада чаз тунвай Ватан кIан хьунин ва инсанвилин весияр! Квез сувар мубаракрай, куь кlвалера шадвилер хьурай!

Гьамидуллагь  Мегьамедов: — 21 йисуз икl тешкиллудаказ кьиле физвай сувар чна чи лезги халкьдин агалкьун яз гьисабзава. Сувар гьар йисуз вини дережада аваз кьиле тухуниз килигна, Шарвилидин сувариз республикадин суварин дережа ганва. Шарвили, чи ата-бубайрин, диде-бу-бай­рин адетар рикlел хкана, абурукай чна хийир къачуна, акьалтзавай несилдиз дуьз тербия гузвай сувар я. Заз инал и су­вар тешкилуник кьил кутур, икьван йиса­ра вини дережада аваз ам кьиле тухузвай тешкилатчи Имам Музамудинович Яралиеваз сагърай лугьуз кlанзава. Тlугъ­вал­диз килигна, алатай йисуз сувар тухуз хьа­начтlани, САНПИН-дин нормайрал амал авуна, алай йисуз тешкиллувилин комитетди Шарвилидин сувар гьар район­да тухудай къарар кьабулна. Квез сувар му­баракрай, куь кlвалера берекатар хьурай!

Савин  Велиев: — Гьуьрметлу жемят, мугьманар, за квез Имам Музамудиновичан патай Шарвилидин сувар рикlин сидкьидай мубаракзава. Квез чизвайвал, Шарви­лидин Ватан Ахцегьар я. Тlугъвал­диз ки­лигна, къе чна сувар Кьасумхуьрел тухуз­ва. Сувар тешкилайдалай инихъ Имам Му­замудиновича тешкилнавай мергьяматлу “Умуд” фондунай спортдин, культурадин, илимдин ва маса хилерай чlехи агалкьунар къазанмишнавайбуруз пулдин премияр ва багьа пишкешар гузва. Къенин нубатдин суваризни тешкиллувилин комитетди цlуд премия тайинарнава”.

С.Велиева “Шарвили” эпосдин сувариз гьа­­зурвилер акваз ашкъидалди мярекатар тухвай  “Куьредин ярар” культурадин центра­дин председатель Агьмедпаша Агьмедпашаевав, художник Низами Агьмедхановав, УО-дин ИМЦ-дин методист Назират Азимовадив, ЦТКНР-дин директордин заместитель Ярагьмед Ярагьмедовав, райондин аялрин художественный школадин муаллим Вагьаб­ Ра­мазановав, ЦБС-дин НуьцIуьгърин фили­ал­­дин заведующий Закират Мегьамедовадив, лезги чlалан муаллимар тир Кадрина Ба­­гъи­шевадив, Лариса Алисултановадив, Диана Ме­­г­ьамеднабиевадив ва  Диляра Идрисовадив сертификатарни пулдин премияр вах­кана.­

Райондин администрациядин кьилин патай сувариз гьазурвилер акунин рекье активнидаказ иштиракай “Аманат” тlвар алай Сардархуьруьн аялрин бахчадин тербиячи Наиля Насрулаевадиз тlварцlин сят, райондин ЦТКНР-дин Бутхуьруьн филиалдин заведующий Назират Ханбалаевадиз ва райондин спортдин, туризмдин ва жегьилрин крарай комитетдин директор Надир Эфендиеваз гьуьрметдин грамотаяр гана.

Вижевай концертдин программани гьазурнавай. Амина Мирзоевади, Камила Эмировади, Амирхан Шагьпазова “Шарвили” эпосдай фасагьатдиз чIукар кIелна, “Леккур” ансамблди кьуьлер авуна. Мугьмандиз атанвай “Гияр” ансамблди, чкадин ЦТКНР-дин хорди, ДМШ-дин квартетди ва тербиячийри тамамарай “Шарвили” манияр чаз гзаф хуш хьана. Гьар са нумра сад-садалай акьван хъсанзавай хьи, чун эхирдалди килигна, хъсандиз ял яна.

Адет хьанвайвал, “Шарвили” эпосдин сувариз цIил ялунай, путар хкажунай ва алай чкадилай яргъаз хкадарунай акъажунарни кьиле фена. Абурун нетижайриз килигна, спортдин, туризмдин ва жегьилрин крарай комитетдин директор Надир Эфендиева путар  хкажунай кlвенкlве чка кьур Азим Абакароваз, яргъаз хкадарунай 1-чка кьур Мурсал Мегьтихановаз ва цIил ялунай гъалибчи хьайи Кьасумхуьруьн 1-нумрадин ДЮСШ-дин командадиз, гьакlни приздин чкаяр кьурбуруз пулдин премияр гана.

Надир Эфендиевахъ галаз авур суьгьбетдай малум хьайивал, мярекатар башламишдалди вилик райондин спорткомитетди жегьилрин парламентни волонтерар галаз санал, сувариз талукьарна, Агъа Стlалдал алай Стlал Сулейманан музейдилай Кьасумхуьруьн майдандал велосипедраллаз чукурун тешкилна.

Милли суварин сергьятра аваз Сулейман-Стальский районда культурадинни илимдин, рикl аладардай ва спортдин хейлин мярекатарни тешкилнавай.

Къагьриман Ибрагьимов