Дагъустандин Муфтиятдин председатель Шамил Алиханова республикадин агьалийриз гзаф кьадар инсанар кIватI жезвай чкайриз тефиниз, духтуррин меслятрал амал авуниз, коронавирусдиз акси раб ягъуниз эвер гана.
“Гьуьрметлу стхаярни вахар, дагъустанвияр. Республикада мад четин гьалар арадал атанва. Здравоохраненидин министерстводин делилралди, коронавирусдихъ галаз алакъалу гьалар къизгъинбур яз амукьзава. Начагъ жезвайбурун кьадар къвердавай гзаф жезва.
Исятда чи виридан умуми везифа и тIегъуьндиз акси акъвазун я. Вуч авун герек я? Роспотребнадзордин пешекаррин, духтуррин теклифрив, меслятрив жавабдарвилелди эгечI, коронавирусдиз акси рапар ягъа. Гзаф кьадар инсанар кIватI жезвай чкайриз, мярекатриз фимир. Ахьтин чкайриз фенвай куь мукьва-кьилийривай, дустаривай яргъа хьухь! За гьакIни диндин векилризни хатасузвилин вири къайдайрал амал авуниз эвер гузва.
Чи хиве неинки са чи, гьакIни чи хизанрин сагъламвилин патахъайни жавабдарвал ава. И кар рикIелай алудна виже къведач. Бала-кьадайривай, тIегъуьнривай, мягькем сагъламвал гуналди, чун Аллагьди хуьрай”, — лагьана Шамил Алиханова.
«Лезги газет»
