Алатай гьафтеда Дагъустандин Кьилин везифаяр вахтуналди тамамарзавай Сергей Меликов Кеферпата авай Южно — Сухокумск шегьердиз мугьман хьана. Ам сифте нубатда Восточно-Сухокумск поселокдивай 4 километрдин яргъа авай гьайванар куьчарзавай хъуьтIуьн къишлахрин чилериз килигна. Малум хьайивал, и чилер яваш-яваш къумадик акатзава.
Инлай вилик фейи чкайрани региондин Кьили яшайишдин идараяр, дараматар авай чкайриз фикир гузвай. Южно-Сухокумск шегьердани региондин Кьил цIийиз эцигнавай “Ромашка” тIвар алай аялрин бахчадиз килигна. Ахпа ада аялрин бахчадин къаншарда авай кьве общежитидал кьил чIугуна. Абурукай сада агьалияр яшайишдин рекьяй хуьдай управление ва муькуьдани агьалийриз яшайишдин рекьяй къуллугъдай комплексный центр авай.
Общежитияр авай гьалдиз баянар гудайла, Сергей Меликова малумарна хьи, агьалийриз яшамиш жедай къулай шартIар тешкилун патал талукь пешекарар ракъурда ва дараматар авай гьал ахтармишда. Гьа са вахтунда региондин Кьили общежитийра яшамиш жезвай агьалийривай коммунальный къуллугърин пулар вахтунда гун истемишна. ГьикI лагьайтIа, и пуларин гьисабдай ЖКХ-дин ва яшайишдин кIвалер ремонтдай фонд арадал къвезва. Идахъ галаз сад хьиз яшайишдин кIвалерин хсуси товариществони тешкилун теклифна.
Региондин Кьил здравоохраненидин идарайризни фена. Коронавирусдиз акси рапар ядай пункт ачухнавай поликлиникада региондин Кьили шегьерда рапар язавай гьал чирна. Малум хьайивал, шегьердин медицинадин идараяр герек вири тадаракралди, дарманралди, вакцинадалди таъмин я.
Идалай гуьгъуьниз С.Меликов физкультурадинни спортдин комплексдиз, “НК Роснефть-Дагнефть” ПАО-дин кьилин имаратриз, Южно-Сухокумскдин электромеханический заводдиз, “Михьи яд” ФЦП-дин сергьятра аваз эцигнавай чиркин ятар михьдай имаратрикай садаз килигна. Чиркин ятар михьдай кьвед лагьай имарат 2014-йисуз эцигиз гъиле кьунай, амма финансар авачирвиляй эцигунар акъвазарнавай. Алай вахтунда и эцигунар РФ-дин “СКФО вилик тухун” госпрограммадик кутунва. 2022-2024-йисара и проект эцигна ишлемишиз вахкун лазим я.
Кеферпатан шегьердилай гуьгъуьниз Сергей Меликов Ногъай райондихъ илифна. Орта-Тюбе хуьре республикадин регьбер 200 аял патал эцигнавай цIийи школадин дараматдиз килигна. Ина ам алава тарсариз атанвай аялрихъ галаз гуьруьшмиш хьана. Терекли-Мектеб хуьре республикадин Кьил РД-дин “Алай аямдин шегьердин гьалар арадал гъун” госпрограммадин сергьятра аваз аваданламишнавай майданрихъ галаз таниш хьана. Гьа и хуьре С.Меликов КПСС-дин райкомдин виликан кьве мертебадин дараматдиз килигна. Адаз капитальный ремонт герек я. Идалай гуьгъуьниз региондин Кьили Баркаллувилин обелискдал цуьквер эцигна.
Хуьре татугай гьалда авай школадин дараматни ава. 1913-йисуз эцигнавай и дараматдин классар, кабинетар санитариядинни эпидемиологиядин нормайрихъ галаз кьазвач. 250 аял патал тир школада алай вахтунда 500 аялди кIелзава. Столовойдин дараматни гъвечIиди я. Учебный кабинетар бес тежезвайвиляй школьникри пуд лагьай сменада кIелдайвал хьун мумкин я.
Республикадин Кьили муниципалитетдин регьберрихъ галаз школадин цIийи дарамат эцигунин гьакъиндай веревирдер авуна. Гьа са вахтунда образованидин министерстводин ва Ногъай райондин регьберрихъ галаз меслят авуна, герек документар туькIуьрунин гьакъиндай тапшуругъ гана.
Кеферпатан районра мугьманвиле авайла, Сергей Меликов ремонтдин кIвалахар куьтягьнавай ногъайрин драмтеатрдин ва фольклординни этнографиядин “Айланай” ансамблдин дараматриз килигна, музыкадин алат домбра гьазурзавай мастерскойдиз, ногъай чIалал акъатзавай “Голос степи” газетдин редакциядизни фена.
«Лезги газет»
