Гьуьрметлу редакция! Гъилевай йисан 28-апрелдиз акъатай “ЦIийи дуьнья” ва “Лезги газетдин” 20-майдин нумрайрай “Шарвили” эпосдин суварин майдан дегишарун теклифзавай макъалаяр за дикъетдивди кIелна. Месэла акьалтIай важиблуди тирвиляй, цин стIалди къванцяйни тIекв акъудда лугьудайвал, за жуван фикирни лугьузва.
“Шарвили” эпосдин суварихъ жегьилар ватанпересар яз тербияламишунин жигьетдай еке метлеб ава. Чи халкьдин садвилин, гьунарлувилин чIехи сувар Ахцегьа кьиле тухунал чна рикIивай дамахзава. Чи халкьдихъ Шарвили хьтин зурба пагьливанар хьайивиляй лезгийрилай, агъзур йисара гьар жуьре чапхунчийринни душманрин хура акъвазуналди, хайи чIал, адетар, меденият хуьз алакьна. Гьавиляй чна и сувар лайихлудаказ ва мадни гурлудаказ кьиле тухвана кIанда. Суварар тухуниз лайихлу чкаяр Ахцегьа пара ава. Чи журналист, РД-дин культурадин лайихлу работник Дашдемир Шерифалиева теклифнавай чка, гьакъикъатдани, къулайди, вири патарихъай лап кутугайди я.
Бязибуру чка дуьздаказ туькIуьрун патал гуя еке такьатар кIанда лугьузва. Харж алачир, ужуз гьар са шей ерисузди жеда. Гьар са кар са жуьре къенин йикъай экъечIун патал ваъ, гележег фикирдаваз, бинелудаказ авун лазим я. Вичин вахтунда суварин майдан хкядайла гъалатI хьайиди къе вирибуру аннамишзава. ГъалатIар туькIуьр хъувун важиблу я.
В.Эмирован парк сурар тирди, аник чи рагьметлу мукьва-кьилияр квайди Ахцегьа чин тийидай кас авач. Хуьруьн юкьва гьатнавай анаг са жуьре михьидаказ хуьн патал вичин вахтунда кIвалер эцигиз тунач, ана Игитдин тIварунихъ галай парк туькIуьрна. Гуьгъуьнлай и паркунин са кьатI атIана, анал гатун театр ва яшайишдин кIвалер, гьажетханаяр эцигна. Амай чкадикайни 2000-йисалай инихъ Шарвилидин суварин кьилин майдан хъувуна. Ажеб тир, анал жемят гьакI кIватI хьана, рахунар авуна хъфизвайтIа. Сурариз кIур гунилай гъейри, анал тийизвай кутуг тавур са кIвалахни авач: манияр-кьуьлер, выставкаярни ярмаркаяр, ички хъун… Им чна, хъуьтуьлдиз лагьайтIа, бубайрин пак адетриз кIур гун жезва.
Эхь, гъалатIар жезва. Абур туькIуьрни хъувун важиблу я эхир. Ни туькIуьр хъийида? Гьелбетда, гъиле гьукум, ихтиярар авай гьакимри. Ингье, заз чиз, къе гъалатIар туькIуьр хъийидай, Аллагьдивай гунагьрилай гъил къачун тIалабдай вахт атанва. Зани, пара ахцегьвийри хьиз, умудзава хьи, Ахцегь райондин руководстводиз ва чи игитвилин “Шарвили” эпосдин суварин Республикадин оргкомитетдин председатель, лезгийрин баркаллу хва Имам Яралиеваз чи ван къведа ва абур къайгъусуз яз амукьдач.
Б. Баширов,
зегьметдин ветеран
