Хив райондин КьванцIилрин хуьре и йикъара шадвилин мярекат кьиле фена. Ина аялар патал спортдал, сагъламвал мягькемарунал машгъул, азад вахт менфятлувилелди тешкилиз жедай, хъсандаказ вири патарихъай тадаракламишнавай майдан  ишлемишиз вахкана. Хуьруьн аялриз ва абурун диде-бубайриз, муаллимриз ва тербиячийриз гьакъикъи сувар багъишна.

Майдандал аялар ва жаванар машгъулардай гзаф алатар, тадаракар эцигнава. Катиз, къугъваз, акъажунар кьиле тухуз жедай вири шартIар тешкилнава. Ихьтин майдан (стадион) бязи шегьеррани, белки, авач.

Хуьре ихьтин мумкинвилер тешкил­на­вай хва, ина школа акьалтIарна, яр­гъал­ йи­сара Красноярск шегьерда яшамиш жезвай карчи  Балакерим  Мирзе­агъа­е­вич  Мегьамедов я. Адан буба вири уьмуьр­да пассажирар тухудай автобусрин рулдихъ хьана. Гьатта 1980-йисуз Москвада кьиле фейи Олимпиададин вахтундани гьана пассажирар ­санай масаниз тух­вана. Ихьтин ихтибар гьар низ хьайи­тIа­ни ийизвайди туш. Яни агьалийриз вафалувилелди къуллугъун­ и хизандин ирс я.

Балакерима, аялриз майдан багъишнавайди хьиз, хуьруьн вири куьчейра экверни тунва, хуьр аваданламишнава.

Шадвилин мярекатдиз КьванцIилиз Хив райондин администрациядин кьил Ярмет Алимович Ярметов, хейлин мугьманар, къунши хуьрерин векилар атанвай, хуьруьн саки вири жемят санал кIватI хьанвай. Вирибуру ихьтин хъсан савкьат багъишайбуруз сагърай лагьана. Генерал Нариман Магьмудович Къазимегьамедован диде, яшлу ветеран Гьуьруьзата Балакериман уьмуьрдин юлдашдиз, савкьат яз вичи хранвай лацу шал багъишна, рикIин деринрай къвезвай алхишарна. Инал гзаф дидеяр, сусар тебрикрин гафар рахана.

За жуван ва гьакI вири кьванцIил­вий­рин патай мергьяматлувилин еке кIва­лах­рик кьил кутунвай Балакерим Мирзеагъаевичан хизандиз сагърай, куь руьгьдин девлетар мадни артух хьурай лу­гьузва.

Чи гьар са хуьруьхъ ихьтин рикI михьи, гъил ачух, жумарт ксар декIени гзаф жен…

Исмаил  Исмаилов,

ДГМУ-дин доцент,

биологиядин илимрин кандидат