12-июндиз чи республикадиз коронавирусдин тIугъвалдиз акси рапарин 11 700 доза (“Спутник V”) мадни ахгакьарнава. И вакцинадин менфятлувал ахтармишун яз, неинки са Россияда, гьакI къецепатан уьлквейрани лазим жуьредин вири ахтармишунар кьиле тухванва. ТIугъвалдиз акси рапар ягъуниз талукь кампаниядин сергьятра аваз ада вичин менфятлувал тестикьарнава. Идакай РД-дин здравоохраненидин министерстводин пресс-къуллугъди хабар гузва.
Илимдин ахтармишунри ва тежрибади къалурзавайвал, “Спутник V” вакцинадин менфятлувили 97% тешкилзава, ам ягъайдалай кьулухъ азардиз акси иммунитет арадал къвезва. 2021-йисан 15-июндалди Дагъустанда 112 629 касди COVID-19 азардиз акси рапар янава.
Республикада коронавирусдикди ва адетдинди тушир стIалжемдикди азарлу жезвайбурун кьадар артух хьун давам жезва. Алай вахтунда республикадин стационарра 1341 касди медицинадин куьмек къачузва. Реанимациядин ва ИТ-дин (интенсивная терапия) отделенийра 110 кас сагъарзава, абурукай 35 кас ИВЛ-дин аппаратрик ква. Коронавирусдикди азарлу жезвайбурун кьадар артух хьунихъ галаз алакъалу яз часпаррин кьадар артухарнава — къенин юкъуз абурун кьадар вири республикада 1459 я.
Азарлу хьанвайбурун арада аялрин кьадар артух хьанва. Абуру гзаф дуьшуьшра азардиз регьятдаказ, кьезил жуьреда дурум гузвач, лазим чIавуз абур республикадин садакай масадак акатдай азаррин центрада къаткурзава. Чпин яшар 40-далай виниз тир агьалийрин арадани кIевиз азарлу жезвайбурун кьадар гзаф хьанва.
Алай вахтунда вакцина термоконтейнерра аваз Дагъустандин гьар са пипIез агакьарзава. Азардиз акси рапар ягъиз кIанзавайбурувай абур и кар патал чара авунвай чкайра — чеб яшамиш жезвай чкайрин поликлиникайра, гьакIни мобильный пунктара ягъиз жезва.
«Лезги газет»
