Гьуьрметлу редакция! Квез чар кхьизвайди Сулейман-Стальский райондин Цицикрин хуьряй тир Анахалум Эскендарова я. Зани уьмуьрдин юлдаш Эскендара 6 аял чIехи авуна. Чпин хизанарни хьана, яшамиш жезва абур, хтулри чун шадарзава. Къуй вири дидейрин рикIер чпин балайрикай секин ва шад хьурай!
Квез чар кхьинин себеб ам я хьи, мукьвара чи хва Валерик (гъилин тупIар цIилини атIанваз) чна тади гьалда райбольницадиз агакьарна. Бубайрин мисалда лагьанвайвал, кар чIур хьайитIани, чIал чидайдал гьалтрай. Дугъриданни, рикIе дерт аваз, чандални азаб алайла, инсанвал квай касдал гьалтунихъ еке важиблувал ава. Чун азарханадиз агакьайла, йифен сятдин 11 жезвай. “Тади куьмекдин” къуллугъчийри са зеррени вахт пучуниз рехъ ганач. Аллагь рази хьурай чпелай виридалай! ГьакI — и юкъуз дежурствода авай хирургдилайни. Ада, кIусни инжиклу тушиз, чи гьарайдиз гьай лагьана. Ам тадиз вичин кIвалахдив эгечIна, гьатта къалабулух акатнавай чунни секинарна. Хирургди хцин тупIар “къутармишна”, кIарабдал фидалди атIанвай хамни якIар хуцвана.
Чаз ахпа чир хьайивал, хирургдин тIвар Гьажимурадов Абузар я. Вични яргъал йисара ина зегьмет чIугвазвай, гьам коллективдин, гьамни азарлуйрин патай еке гьуьрмет къазанмишнавай кас. Аферин, чухсагъул вичиз! Инсандин виридалайни еке девлет чандин сагъвал я. И рекье, йиф-югъ талгьана, зегьмет чIугвазвай Абузар духтурдиз ва амайбурузни къуй Сад Аллагьди вири хъсанвилер гурай!
«Лезги газет»
