18-июндиз РД-дин Гьукуматдин Председателдин заместитель Абдулмуслим Абдулмуслимов, кIвалахдин рекьяй Москвада авайла, РФ-дин хуьруьн майишатдин министрдин заместитель Оксана Лутахъ галаз гуьруьшмиш хьана.
Гуьруьшдин кьилин темайрикай сад государстводин “Хуьруьн мулкар комплекснидаказ вилик тухун” программа уьмуьрдиз кечирмишзавай месэла хьана. Адан сергьятра аваз республикада 2021-2023 — йисара 816,7 миллион манатдин къимет авай 12 объект эцигун планламишнава. Гьа гьисабдай яз, и эцигунар кьиле тухун патал федеральный бюджетдай — 775,9 миллион, региональный бюджетдайни 40,8 миллион манат чара ийида.
Кьилди къачуртIа, А.Абдулмуслимова малумарайвал, кьве школа эцигун планламишнава: 120 ученикдин чкаяр авай школа — Ахцегьа ва 400 чка авай школа Сулейман-Стальский райондин Агъа СтIал-Къазмайрал. И программадин сергьятра аваз республикадин хуьрера целди таъминардай 3 объект, газламишдай 5 объект ва спортдин дараматар эцигда.
Оксана Лута ва Абдулмуслим Абдулмуслимова и объектрикай гьар сад гьи дережада аватIа веревирдна. Гележегда государстводин программа уьмуьрдиз кечирмишунин месэлайриз килигна. Абуру гьакIни Дагъустандин агропромышленный комплекс вилик тухунин кар алай хилер веревирдна, гьа гьисабдай яз, хипехъанвал, багъманчивал, уьзуьмчивал, хуьруьн майишатдин продукция гьялун хьтин терефарни.
«Лезги газет»
