Алай йисан 7-июндилай 19-июндалди Дербент шегьердин 16-нумрадин мектебда лезги чIалай муаллимрин чирвилерин дережа хкаждай курсар кьиле фена. Ана Дербент шегьердай ва лезги районрай 25-далай виниз муаллимри иштиракна.
Муаллимриз ДИРО-дин кьилин муаллим Нагима Таймуровади алай девирда ФГОС-дин истемишунри тIалабзавай къайдайралди лезги чIалай ва литературадай тарсар тухунин методикадай, валеологиядай, психологиядай лекцияр кIелна.
Курсарин вахтунда Дербент шегьердин 2-нумрадин гимназиядин лезги чIаланни литературадин муаллим Альбина Магьмудовади “Подлежащидин уьлкведиз сиягьат”, и цIарарин авторди 5-классда “Обстоятельство” темайрай тарсар, мастер-классар гана. СтIал Сулейманан райондин Вини СтIалрин юкьван мектебдин муаллим Тамила Султанагьмедовади Кьуьчхуьр Саидан уьмуьрдин ва яратмишунрин рекьиз бахшнавай “Халкьдиз экв гъайи гъед” ачух тарс тухвана.
Менфятлу, итижлу ва рикIел аламукьдай курсар тухунай вири муаллимри ДИРО-дин кьилин муаллим Нагима Таймуровадиз чухсагъул лугьузва.
Муаллимрихъ чпин кIвалахда, хайи чIал хуьнин, вилик тухунин ва акьалтзавай несилдал агакьарунин карда агалкьунар хьурай.
Жамилия Жигерова,
Эминхуьруьн юкьван мектебдин
лезги чIаланни литературадин муаллим
