Дагъустандин образованидин ва илимдин министерстводи хабар гайивал, Дагъустанда, шаз хьиз, цIини хайи чIалар чирунин месэлайриз региондин бюджетдай 20 миллион манат пул чара ийида.
Министерстводин пресс-къуллугъдин делилралди, такьатрин асул пай хайи чIаларал акъатзавай ктабар маса къачуниз харжда ва абур республикадин мектебриз рекье твада.
“Гьайиф хьи, эхиримжи йисара вири дуьньяда гзаф кьадар чIалар квахьунин месэла хцидаказ акъвазнава. Гьавиляй и кардиз виринра кьетIен фикир гузва. Хайи чIалар хуьнин рекье виридалайни кар алай камарикай сад хизанда диде-бубаяр чпин веледрихъ галаз дидед чIалал рахун я”, — алава хъувуна министерстводин векилди.
Къейд ийин хьи, Дагъустан уьлкведа виридалайни гзаф кьадар миллетар яшамиш жезвай республика я. 14 чIалал газетарни журналар акъатзава, телерадиопередачаяр гьазурзава.
«Лезги газет»
