Крымдин зиянар
Крымдин вице-премьер Е.Кабанова къейднавайвал, ятар акьалтунин нетижада чIур хьайи республикадин рекьер ва инфраструктурадин маса дараматар гуьнгуьна хтун патал тахминан 5,5 миллиард манат пул герек жеда. Адан фикир “Новости” РИА-ди раижзава.
Крымдин са шумуд шегьердал июндин мукьвара яд акьалтна. ТIебиатдин бедбахтвилин нетижада полуостровдин са шумуд райондизни шегьердиз зиянар хьана. Алай вахтунда ана кьетIен гьаларин къайда кардик кутунва.
Санкцийрин тIем акакьдач
США-дивай санкцийрин куьмекдалди “Северный поток-2” акъвазариз жедач. “ТАСС” чешмеди хабар гузвайвал, ихьтин фикир Европадин ва Евразиядин крарин рекьяй Америкадин дипведомстводин кьилин куьмекчи Ф.Рикера малумарна.
Амма им газопроводдин гьакъиндай США-дин терефди фикир дегишарнава лагьай чIал туш. “Чна газопровод Россиядин геополитический проект яз гьисабда”, — лагьана Рикера. Адан гафаралди, “Северный поток-2” проектди гуя Европадин энергетический хатасузвал къурхулувилик кутазва.
Сифтедай “Северный поток-2” 2019-йисан эхирда кардик кутун фикирдиз къачунай, амма, Америкадин санкцияр себеб яз, ам са шумуд сеферда кьулухъ яна, тамамарна акьалтIариз хьанач.
Лукашенкоди тебрикна
Белоруссиядин президент А.Лукашенкоди Эрменистандин премьер-министрдин везифаяр тамамарзавай Н.Пашинянан “Гражданский договор” партия парламентдин нубатдинбур тушир сечкийра гъалиб хьун мубаракна, хабар гузва “БЕЛТА” чешмеди. Лукашенко инанмиш тирвал, Белоруссиядинни Эрменистандин арада авай хъсан алакъаяр жуьреба-жуьре хилера давам жеда.
Сечкийра Пашиняназ 53,92 процент сесер хьана. Кьвед лагьай чкадал виликан президент Р.Кочарянан “Армения” блок хьана, пуд лагьай чкадал — виликан муькуь президент С.Саргсянан “Честь имею” блок.
Магълуб хьанвайбуруз сечкийрин нетижайрин патахъай гьуьжетар кьиле тухудай къастар ава.
Вакцинадин чарасузвал
Къуллугъар кьилиз акъудзавай работникар патал Свердловскдин областда коронавирусдиз акси рапар ягъунин серенжем чарасузди яз тестикьардай къарар кьабулнава. Ихьтин фикир анин губернатор Е.Куйвашева “E1.ru” чешмедиз малумарна.
Областдин администрацияди кIвалахар гузвай ксариз чпин къуллугъчийриз рапар ягъун теклифда. Областдиз вакцинаяр гъунин кьилдин план арадал гъайидалай кьулухъ чарасуздаказ рапар ягъунин кар башламишда. Идалайни гъейри, регионда тIугъвалдин гьалар пайгардик ахкат тавунмаз, халкьдин гегьенш къатарин иштираквал авай мярекатар тешкилдач.
Бязи агьалийриз коронавирусдиз акси рапар чарасуздаказ ягъунин къарар идалай вилик Нижний Новгороддин областдин гьукумдаррини кьабулнай. И жуьредин серенжемар Москвадани, Подмосковьедани, Санкт-Петербургдани, Ленинграддин, Твердин, Туладин ва Кемероводин областрани, Башкириядани, Хабаровскдани, Мурманскдани, Ненецкий автономный округдани, Сахалиндани кардик кутунва.
Кьиферин гьужум
Австралиядин штатда, кьиферин гьужум себеб яз, дустагъда авай 420 кас ва 200-далай гзаф къуллугъчияр маса дустагъриз акъудна. Идакай “СNN” чешмеди кхьизва.
Къейдзавайвал, кьифери дустагъдин инфраструктурадиз зарар гана, къенепатан къав ва электричестводин шнурар къайдадикай хкудна. Ажайиб агьвалат арадал атайдалай кьулухъ пешекарри тестикьарнавайвал, кьифер дустагъдин дараматдиз ем жагъурунин ва чуьнуьх хьунин мураддалди гьахьна.
Индиядин штамм
Коронавирусдин Индиядин штамм Минскдани дуьздал акъуднава. А уьлкведин минздравдин малумат “Новости” РИА-ди раижна.
Ахтармишай цIуд чешнедай Индиядин штаммдин лишанар жагъанва, амма Белоруссиядин муькуь шегьерра гьелелиг ам тайинарнавач.
Чешмеди алава хъийизвайвал, и йисан июндиз Россияда ковиддикди азарлу хьанвайбурун кьадар артух хьун Индиядин штаммдихъ галаз алакъалу я. Мисал яз, Москвада начагъ хьанвайбурун саки 90 процентдик гьа и жуьредин коронавирус акатнава.
Яргъи уьмуьрдин сирер
Алим ва духтур Ф.Аматиди яргъи уьмуьр кьиле тухузвай ксар авай чкаяр тайинарнава. Пешекарди тестикьарзавайвал, Япониядин Окинава, Италиядин Сардиния, Грециядин Икария островра, Коста-Рикадин Никоя полуостровда ва Калифорниядин Лома-Линда районда, амай чкайрив гекъигайла, инсанрин уьмуьрдин яргъивал цIуд йисалайни артух жезва. Идакай “Express” чешмеди хабар гузва.
Малумарзавайвал, тIварар кьунвай чкайрин агьалийри тIуьнин еринда гзафни-гзаф набататрикай менфят къачузва: емишрикай, салан майвайрикай, чIахарикай ва пахлайрикай. Идалайни гъейри, абуру тIуьн кьадардилай са кIус тIимил незва. Духтурди гьар юкъуз гзаф къекъуьн ва ички квай затIар тIимил хъун теклифзава.
«Лезги газет»
