11-июндиз 83 йисан яшда аваз лезгийрин бажарагълу ша­ир Мамеджафаров Мурсал Худавердиевич (Мурсал Алпан) кечмиш хьана. Аллагьдин рагьметдик кваз хьуй.

М.Х.Мамеджафаров 1938-йи­­сан 10-декабрдиз Ахцегь райондин Смугъулрин хуьре дидедиз хьана. Юкьван мектеб, ахпа Ленинграддин технологический институт куьтягьна. Вичин пешекарвиляй гзаф йисара Хаса­вюрт­­дин ва Махачкъаладин­ кар­ха­­найра кIвалахна. Гьа са вахтунда­ шиирар ва публицистикадин материалар кхьинал машгъул тир. Ада лезги ва урус чIаларал акъа­тай аслу тушир “Лезгистандин ха­барар” ва “Кьибледин гъед” га­зет­рин редакторвални авуна. 1988-йисуз СССР-дин пи­сател­рин­ ­Союздин членвиле кьабул­на­.­

Мурсал Алпанан сифте шиирар ва гьикаяяр 1970-йисалай “ЦIийи дуьнья”, “Коммунист” (ги­л­ан­­ “Лезги газет”) газетриз акъатиз хьана. Гуьгъуьнин йисара адан эсерар “Чирагъ” (1973) ва ма­са умуми кIватIалрик акатна. 1983-йи­суз адан сад лагьай ктаб “Чирагъ”, гуьгъуьнин йисара “Ел­кен” (1988), “Сир” (1990), “Ирс” (1992), “Ал­паб” (1993), “Бигер” (2000), “Дар югъ” (2008), “Гьайкал” (2016) ва маса ктабар акъатна. Абурун кьилин те­маяр инсанпересвални ватанпересвал я: халкьдин тарихдал дамахун, милли адетриз вафалу хьун, руьгьдин михьивал ва девлетлувал хуьн.

Мурсал Алпанан бязи эсерар урус чIалаз элкъуьрнава. Абур 1990-йисара “Советрин Дагъустан” журналда чапна ва “Цавун цIа­ярин рухваяр” кIватIалдиз (2011) акъатнава.

Яшлу писатель, Смугъулрин хуьруьн агъсакъалрин советдин председатель, райондин “ЦIийи дуьнья” газетдин дуст эхиримжи йисара хайи хуьре яшамиш жезвай ва редакциядин коллективдихъ галаз яратмишунин сих алакъаяр хуьзвай.

Мамеджафаров Мурсал Худавердиевич рагьметдиз финихъ галаз ала­къа­лу яз адан хи­зандиз ва вири багърийриз чна, дериндай хажалат чIугу­налди, башсагълугъвал гузва.

Ахцегь райондин администрация,

“Лезги  газетдин” редакциядин коллектив