Хуьда за!
Вал дамахиз, лезги халкьар уях яз,
Акъваз тийир, яйлахдин са булах яз,
Зи чIехи чIал, вун зи кьилин дамах яз,
РикIе туна хуьда за вун, лезги чIал!
Яраб чилел алатIа гекъигдай
Са затI ахьтин, ви къаншарда эцигдай?
Маса емиш жагъич, вал нур илигдай.
РикIе туна хуьда за вун хайи чIал!
Нагагь ирид цаварал зун фейитIан,
А кьил тахьай гъурбатда зун хьайитIан,
Вахъ кузвай рикI, зи уьмуьрни гайитIан,
РикIе жеда анжах ви сес, лезги чIал!
Гьар лезгиди, шаксуз, валди дамахда,
Шумуд кьегьал хвена на ви къужахда!
Гьар са лезги вун мублагьиз алахъда,
Аллагьд патай — заз хазина, лезги чIал.
Дагъви рушан ягь-намусдин бине хьиз,
Ширин мецел рахай, хайи диде хьиз,
Ракьни гьулдан лигимай, са къеле хьиз,
Чи къуллугъда акъвазнава лезги чIал.
Чан къурбанд хьуй хайи чIалан нефесдиз,
Къуллугъзавай рикIин ашкъи-гьевесдиз!
Ви бине кутур пайгъамбар — иесдиз,
Дидедиз хьиз, икрамзава, лезги чIал!
Вини СтIал
«Лезги газетдин» 2021-йисан 24-нумрадай
_______________________________________________
Лагь кван, дустар
Лезет хкудиз гележегдин уьмуьрда,
Лагь кван, дустар, гьи шаир тир бахтлуди?
Бязибуру лугьудай хьиз, кеф чIугваз!
Гьи шаирдин уьмуьр хьанай нурлуди?
Етим Эмин хьанани, лагь, бахтлуди?
Уьмуьр чагъинда, вич месе хьайид тир.
Гьахъсузвилин фана дуьнья акунвай,
Дуьньядикай адан рикIни хайид тир.
СтIал Сулейман тирни, дустар, бахтлуди?
ЧIехи бубад гадрай тIуназ калерин,
ЧIехи жезвай вил галачир цицIиб хьиз,
Дад такуна хайи дидед некIедин.
Лагь кван, дустар, Омарла тирни бахтлуди?
Эхиз тахьай алай гужар халкьарал.
Кимел ягъай гьар манидай жаллатIри
Кьисас патал дуван ийиз яцарал.
Анхил Марин тирни, лагь кван, бахтлуди?
Кесиб патал гьахъ гафунал кIевид тир,
Шииратдин хци турунихъай кичIе тир,
Алчахри адан сивни цвайид тир.
Кьуьчхуьр Саид лугьуз жедан бахтлуди?
Мурсал хан вич чилериз физ чилерай,
КIвализ гъана буьгьтен вегьей кьегьалдал,
Кьурай гъили экв магьрумнай вилерай.
СтIал Саяд тирни, дустар, бахтлуди?
Хайи бубад такIандаз гуз, гуж хьайи,
Гьахъсузвилин хажалатдин пар кIула,
20 йисаваз жегьил уьмуьр пуч хьайи.
Гъетягъ Вадим хьанани, лагь, бахтлуди?
Кьве веледдин мейит акур вилериз,
РикIе туна хвейид тир а кьве велед,
МичIи сура тунвай вичин гъилерив.
Лагь кван, дустар, Замир яни бахтлуди?
Диде-бубади хтул метIел кьун тавур,
Диде-буба кечмиш хьайи, вил галаз,
Чан аламаз чпиз хтулар акун тавур.
Лагь кван, дустар, гьикI бахтлу хьуй шаирар?
Ажузбурухъ, ужузбурухъ рикI кузвай,
Алчахвилер негь ийизвай лянет гъиз,
Шаирар я, бахтсузбурухъ рикI гузвай.
«Лезги газетдин» 2023-йисан 12-нумрадай
________________________________________________
Гьайиф кьегьал
Мад дяведин цIай къурмишна душманди,
Ислягь халкьар тергун себеб вуч ятIа?
ЧукIуриз гьакI шегьерарни хуьрерни,
Халкьдиз гъанвай, лагь кван, им вуч гуж ятIа.
Малумарна мобилизаци уьлкведа,
Яракь кьадай эверзава жергейриз.
ЧIарар чухваз чеб гьалчзавай чилерал,
Вуж килигуй хур гатазвай дидейриз?
Сад хьанавай кьве стха тир миллетдин.
Душманри къе цIай тунава арада.
Санал фу тIуьр чи стхаяр, чи дустар,
Телеф хьана, чир жезмачиз харада.
Секин кIвале цIай къурмишна дяведин,
Яракь ава куь галатай гъилера.
Къуй Аллагьди жаза гурай душмандиз,
Жегьенемдин кьуркьушум цуй вилера.
США-дини Европади сад хьана,
Дявед ялав къати ийиз, рехъ гузва.
Зеленскийдиз кIараб вегьез, кицIиз хьиз,
Дявед суьрсет, гьакI доллардин гьахъ гузва.
Дяведин цIай хуьзва гьакIни НАТО-ди
Луганскда, Херсондани Донбассда.
Мариуполь элкъуьрна цIун ялавдиз,
Шумуд уьлкве чакъалди хьиз мад кIасда?
Чи жегьилар, чи аскерар, факъирар
И дуьньядай фена чеб гьич тахьай хьиз.
Умуд кьатIна жегьил чанар пуч хьана,
Телеф хьана, дуьньядин пай атIай хьиз.
ВинистIалви Мегьамедан Аслан хва,
Мехъер тавур, ам дяведиз тухванай.
Гьайиф кьегьал, вил галамай уьмуьрдихъ.
Дидедин рикI и хабарди атIанай.
Ви дидеди гьикI эх авуй, Аслан хва,
И дуьшуьш вахъ, кьегьал хва, гьикI агатна?
Гуьзет тавур, бейхабардиз чIуру кар,
ЦIун майдандиз, чан хва, вун гьикI акъатна?
Ви дидедин пер хана и дуьньядкай,
Ахварай ам «Аслан» лугьуз рахазва.
Пашманвили чIулав ясда тур диде,
«Аслан» лугьуз, кьве гъили хур гатазва.
Им вуч гуж я, вуч зиллет я, сад Аллагь,
Къе бубадин накъвар гъидай вилерал.
Вилин нини лугьуз хвейи Аслан хва,
Мягьфедава, вичин бубад къуьнерал.
Мехъерикай фикирзавай кьегьалдин
Мурад кьатIна гуьлледи са душмандин.
Гъилер–кIвачер галатуй а жаллатIдин,
Ви дидедал шал вегьенвай къе ясдин.
Гьайиф Аслан, чи кьегьал хва, гьайиф я,
Вичин хура лап асландин рикI авай.
Агь, къелемдин кьатI хьана хьи таза хел
Мехъер емиш дигмиш тахьай цуьк амай.
Акъваз хьурай кьиникьарни дявеяр,
ЦIай терг хьурай лап чилерай чилерик.
Сагъ-саламат хьурай вири аскерар,
Шад лувар жен чи дидейрин рикIерик!
«Лезги газетдин» 2023-йисан 24-нумрадай.
____________________________
РикIе туна хуьда
Вал дамахиз, лезги халкьар уях яз,
Акъваз тийир михьи зем-зем булах яз,
Пак хайи чIал, вун зи кьилин дамах яз,
РикIе туна, хуьда за вун, лезги чIал.
Яраб аватIа мад затI вав гекъигдай,
Чилел чка жагъидач вун эцигдай.
Маса емиш жагъич вал тIур илигдай,
Женнетд тарцин зурба тан я хайи чIал.
Эгер нагагь ирид цавал фейитIан,
Тум-кьил тахьай гъурбатда зун хьайитIан,
Вахъ кузавай вири уьмуьр гайитIан,
Зи япара анжах ви сес, лезги чIал.
Гьар лезгидин, шаксуз, я вун дамахда,
Шумуд кьегьал хвена на ви къужахда,
Гьар лезгид бурж вун мублагьиз алахъдай,
Аллагьд патай хазина я, хайи чIал.
Дагъви рушан ягь-намусдин бине хьиз,
Ширин мецел рахазвай зи диде хьиз,
Ракь гьулдандал лигимай са къеле хьиз,
Чи къаразда акъвазнава лезги чIал.
Къуллугъзавай ачух рикIин гьевесдиз,
Чан къурбанд хьуй хайи чIалан гьевесдиз,
Ви бинеда хьайи гьар са иесдиз
Дидедиз хьиз, икрамда за, хайи чIал.
Замира лап дамахда
Замира дамахда ислягь хизандал,
Малаикар хьиз я абур женнетдин.
ГьикI дамахдач ихьтин туькIвей хизандал,
Чеб чешне тир сабур, хатур-гьуьрметдин.
Айиб тушни дамах тавун хизандал,
Ислягь хизан Аллагьд патай гунуг я.
Чубарукри кутур чими гатфарин
Женнетд къушран ухшар авай са муг я.
ТуькIвей пабни Аллагьд патай пишкеш я,
Къуьн-къуьневаз уьмуьр тухур рикI хьтин.
КIвализни-кIвал, итимдизни вафалу,
РикIин хиял, женнет багъдин цуьк хьтин.
Гъилерал кьаз, хуьха гьарда жуван паб,
Къул хуьзвай паб хазина я дуьнедин.
Малаикар багъишай а юлдашдин
Кефи хадан ви балайрин дидедин.
И дуьнедин куркур хьана кIандай рикI,
Гьар дишегьли хуьдай за, зи рикIе тваз.
Рушан кIвачик чан руг ийиз гьазур яз,
Гьар дишегьли вичин бахтун рекье тваз.
Са рушални татурай тIвар «бахтсузди»,
Пашманвилин нагъв тахьурай вилерал.
Чи таватар, чи уьмуьрдин юлдашар
Дамахдивди кьуна хуьха гъилерал.
Хизан хуьзва асиррилай асирралд,
Герек хьайтIа, цIайни кана лап чандал
Аферинар къведа анжах а касдал
ГьакI дамахдай вичин папал, хизандал.
Акур чIавуз туькIвей хизан ислягьдиз
Замиран лап рикIик лувар акатда.
Вафалувал, гьуьрмет-хатур хуьзавай
А хизандив шадлу сувар агатда.
«Лезги газетдин» 2024-йисан 1-нумрадай.
