Къудратлу, ислягь Советрин Союздал хабарсуз вегьей вагьши Гитлеран фашистар терг авуник, Ватандин ЧIехи дяведа Гъалибвал къазанмишуник уьлкведин муаллимрини лайихлу пай кутуна.
1941-1945-йисара СССР-дин гьар патахъай агъзурралди муаллимар уьлкведин аслу туширвал хуьз къарагъна. Абуру лап къати женгера игитвилелди душман кукIварна, Ватан ва Европадин уьлквеярни чапхунчийрикай къутармишна.
Яру Армиядин жергейра авай савадлу аскерар хьуниз килигна, муаллимрин чIехи паюнив военный училищеяр куьтягьиз туна. Абурукай дяведин кар, уламар чидай викIегь командирарни танкистар, летчикарни разведчикар хьана ва дяведин вири жуьрейрин фронтда фашистар къирмишна.
1941-1945-йисара душмандин хура гьулданар хьана акъвазай, чанар гайи гзаф муаллимар Советрин Гьукуматди къейдна. Абурун арадай СССР-дин игитар, генералар, командирар акъатна. Гьа гьисабдай яз, — Советрин Союздин Игит Шамсулла Алиевни.
Алиев Шамсулла Фейзуллаевич 1916-йисуз Дербент шегьерда дидедиз хьана. 1931-йисуз ада ина педтехникум куьтягьна, Дербент райондин Деличобан хуьре муаллим яз кIвалахна.
1942-йисан январдин вацра ам Ватан хуьз фена. Баку шегьердин высший командный училищеда дяведин чирвилер къачур 339-стрелковый дивизиядин капитанди, отделенидин командирди Кавказ, Кубань, Тамань немсерин фашистрикай азадна, Крым патални къати женгер тухвана.
Крым душмандикай азаддайла, Шамсулла Алиев кьиле авай батальонди 250-далай виниз фашистар тергна, дяведин хейлин техника, яракьар авай складар душманривай вахчуна.
Ш.Алиева дяведин женгера лап четин чкайра вичин викIегьвал къалуриз, душмандин хуруз кичIе тахьана физ, амай вири аскерриз вичелай чешне къалуриз, абурун руьгь хкажиз хьана.
1943-йисан 14-ноябрдиз Керчь шегьер патал фейи къати женгера викIегь командирдихъ душмандин гуьлле галукьна ва ада, гузвай эхиримжи команда яз, лагьана: “Гъалибвал мукьвал ала, анжах виликди алад!..”
Дяведа къалурай гьунарриз килигна, 1944-йисан 16-майдиз Шамсулла Алиеваз Советрин Союздин Игитвилин тIвар гана. Игит рухвайрин тIварар чи халкьарин рикIера эбеди я.
Рамазан Велибегов,
тарихчи, писатель
