Алай девирдин алакъадин тадаракар — мобильный телефонар, электронный почта (ва икI мад) чун алцурардай такьатриз элкъвенвайди сир туш. Гьавиляй чна мукъаятвални артухарна кIанда.

Иллаки яшариз чIехи инсанрал лутуйрин «рикI ала». ГьикI хьи, сад лагьайди, абурухъ кIватIнавай чпин кепекар ава, лутуйрин макьсадни абур чпихъ ялун я. Кьвед лагьайди, яшлу инсанрин арада кьилди яшамиш жезвайбур, чеб гъавурда твадай кас патав гвачирбурни кими туш. Гьаниз килигна, къанун-къайда хуьдай органрин къуллугъчийри эвер гузва: телефондиз тийижир ксарилай къвезвай зенгерин тIалабунар кьилиз акъудиз чалишмишвалмир. Иник гьатта куь карта блокировать хьанва, ам алудун патал адан нумра тикрар хъия лугьудай­бурни хьун мумкин я. Гьикьван идакай ла­гьанватIани, гъавурда твазватIани, яшлу ксари и меслятар инкарзава. Нетижада картада йисаралди кIватI­навай пулар са декьи­кьада лутуйрин гъиле твазва. Ихьтин вахтара тади гьалда полициядиз хабар гун герек я.

Куь такьатар хуьн патал ихьтин меслятрикай мадни менфят къачу:

—           банкарин картайрикай делилар ва абурун кIанел алай пуд число (СVC код) садазни лугьумир;

—           паролар, куь телефондиз къвезвай СМС- ар раижмир;

—           вирусар терг авун патал малум тушир ксари  ракъурнавай приложенияр ва ссылкаяр ишлемишмир;

—           тийижир ксарив куь карта ва телефон вугумир;

—           и ва я маса месэлаяр авайла, гьи­кьван­ четин хьайитIани, банкдиз фена,  анин къуллугъчийрин куьмекдалди абур гьялиз чалишмиш хьухь!

«Лезги газет»