И серенжемдин сергьятра аваз алай вахтунда чи республикада законсуздаказ канабар цунин ва абуралди алвер авунин тахсиркарвилерин вилик пад кьунихъ элкъуьрнавай кIвалах кьилиз акъудзава. Адан макьсаддик къадагъа авунвай шейэр гьазурунин, маса гунин, хуьнин делилар дуьздал акъудунни, наркотикар квай набататар ва абур маса гузвай чкаяр (притонар) терг авунни, агьалийрин арада тахсиркарвилерин вилик пад кьунин кIвалах кьиле тухунни ква.
МВД-дин сайтда хабар гузвайвал, са шумуд югъ идалай вилик полициядин къуллугъчийриз “Мак -2021” серенжемдин сергьятра аваз кьиле тухвай кIвалахдин нетижада Мегьарамдхуьруьн райондин Хтун-Къазмайрин хуьруьн кьилихъ канабриз ухшар авай валар алай чка жагъана. Къалурнавай чкадал силисдин оперативный десте атана. Анай жагъай 43 вал абуру МВД-дин ЭКЦ-диз (экспертно-криминалистический центр) рекье туна. Экспертрин къарардал асаслу яз, жагъай валар канабдинбур хьана.
Тахсиркарвилин вилик пад кьуниз талукьарнавай серенжемрин нетижада полициядин къуллугъчийри канабар цанвайди ва абурухъ гелкъвезвайди 43 йисан яшда авай и хуьруьнви хьун мумкин тирди дуьздал акъудна. Ам кьуна ва РОВД-диз хкана. Ина лагьайтIа, жегьил итимди вичин тахсиркарвал, къадагъа авунвай набататар ишлемишун патал цанвайди хиве кьуна.
Россиядин МВД-дин Мегьарамдхуьруьн районда авай отделди шак физвайдак РФ-дин Уголовный Кодексдин 231-статьядин 1-паюнай тахсиркарвал кутунва. И статьядай тахсиркардиз 2 йисал къведалди кар атIун къалурнава.
Чи мухбир
