Са тIимил йикъар идалай вилик Болгариядин София шегьерда 16 йисал къведалди яшда авай жаванрин арада Европадин кIвенкIвечивал къазанмишун патал азаддаказ кьуршахар кьунай акъажунар кьиле фена. Ана Россиядин хкянавай командадик квай спортсменри къизилдин 8 медаль къазанмишна. И еке агалкьуник лайихлу пай кутурбурун жергеда чи ватандаш, вичин ери-бине Дербент райондин Белиждай тир Адам Ремихановни хьунал чна дамахзава.
Европадин кIвенкIвечивал патал акъажунрин финалдиз акъатдалди, чи ватандашди 3 бягьс кьиле тухвана. Ярумчух финалда ада Молдовадай тир Борс Алехандрудиз гъалибвал къазанмишдай са зеррени мумкинвал тунач — бягьс 10:0 гьисабдалди акьалтIна. Финалда А.Ремиханова Украинадай тир Егор Горохахъ галаз вичин къуватар ахтармишна. Инани ада инанмишвилелди гъалибвал — Европадин кIвенкIвечивилин тIвар — къазанмишна.
РикIел хкин: тренер Вагиф Къазиеван (азаддаказ кьуршахар кьунай дуьньядин чемпион, Москвадин жаванрин хкянавай командадин старший тренер) гъилик Белиждин 2-нумрадин ДЮСШ-да азаддаказ кьуршахар кьунал рикIивай машгъул жезвай чи кьегьалдин агалкьунрикай чна идалай виликни газетдай хабар ганай. Кьилди къачуртIа, А.Ремиханова алай йисан февралдиз Хасавюртда, Гь.Гьамидован тIварунихъ галай спортдин дворецда, азаддаказ кьуршахар кьунай жаванрин арада Дагъустандин кIвенкIвечивал патал кьиле фейи акъажунра гъалибвал къазанмишайдакай кхьенай. Спортдал ам 10 йиса авайла машгъул жез эгечIна. Сифтегьан агалкьун ада Орёл шегьерда кьиле фейи акъажунра къазанмишна. Алай вахтунда Адама Белиждин А.Исрафилован тIварунихъ галай 1-нумрадин гимназиядин 9-классда кIелзава.
Чаз гуьгъуьнлай чир хъхьайвал, алай йисуз Адамакай Москвадин кIвенкIвечивал патал акъажунрин призерни, Наро-Фоминскда кьиле фейи Россиядин кIвенкIвечивал патал акъажунрин гъалибчини хьана. Ахпа, спортда кьабулнавай къайда тирвал, алакьунар авай кьегьал Европадин кIвен-кIвечивал патал акъажунра иштиракдайбурун сиягьдик кутуна. Аквазвайвал, ада вичик кутур умудар кьилиз акъудна. Аферин кьегьалдиз, гьакI адаз вердишвилер гузвай тренердизни, диде-бубадизни!
Рагнеда Рамалданова
________________________________________________
Накь, газет чапдиз вахкудайла, “Лезги газетдин” хсуси мухбир Къагьриман Ибрагьимова чаз хабар гайивал, Адам Ремиханов Дербент райондин администрацияда шад гьалара кьабулна.
Мярекатда райондин кьил Мавсум Рагьимова, депутатрин собранидин председатель Мажмутдин Семедова, РД-дин Халкьдин Собранидин депутат Эрик Ибрагьимова, тIвар-ван авай спортсменри, администрациядин къуллугъчийри ва масабуру иштиракна.
М.Рагьимова цIийи чемпиондиз еке агалкьун тебрикна, адан тIварцIихъ алхишдин келимаяр лагьана.
— Вун чи умуд, чи дамах я! Вуна неинки жуван хуьр, чи район, Дагъустан машгьурзава, гьакI вуна чи чIехи уьлкведин тIварни гьуьндуьр дережайриз хкажзава. Жаван тир ви агалкьуни чак руьгь кутазва, гележегда валай дуьньядин ва Олимпиададин къугъунрин чемпионвилин тIварарни къазанмишиз алакьунин умудлувал гузва, — къейдна ада.
