Ахцегь райондин “ЦIийи дуьнья” газетдин редактор, РД-дин культурадин лайихлу работник Дашдемир Шерифалиева Ахцегьа “Шарвили” эпосдин сувар кьиле тухузвай майдан дегишарунин гьакъиндай кхьенвай Ачух чар за кIелна. Лап важиблу месэла къарагъарнава касди. Адаз Ахцегь райондин администрацияди, “Шарвили” эпосдин суварин тешкиллувилин комитетди фикир гудайдак умуд кутазва. За Д.Шерифалиеван теклифдин тереф ихьтин шиирдалди хуьзва:
Чархун муькъуьн къаншардавай,
Хъсан лайих майдандавай,
Гьар патахъай рекьер ачух,
Тарих — къадим, муькъвер — ачух.
Хуьруьн юкьва женнетдин багъ,
Вичиз лайих сергьят авай,
Кьуд патахъай яшайишдин
Гегьенш, чIехи кIвалер галай.
Ахцегь вацIун сагъламвилин,
ТIебиатдин сегьер авай,
Тариф алай парк тир майдан,
Лап женнетдиз ухшар авай.
Къекъуьналдини жагъидач
Ихьтин майдан шегьердавай.
Шарвилидин кIвалер акваз,
КьантIардаллай регъверни кваз.
Шарвили вич яшамиш хьай
Кьакьан юрдар цуькведа хьуй!
Шарвилидин цIийи майдан
Лезги халкьдиз мубарак хьуй!
Гьемдуллагь Бабаев,
РД-дин культурадин лайихлу работник
