И мукьвара РД-дин финансринни праводин институтда Дагъустандин жемиятдин кIватIалрин “Ватан хуьдайди” союздин председатель Гь.Б.Абдулжелилова институтдин ректор, экономикадин илимрин кандидат, доцент, РД-дин ва РФ-дин образованидин отличник Алиев Рамиз Нурдиновичаз халкьдин патай виниз тир гьуьрметдин дережа къалурзавай “Дагъустандин намус ва дамах — Къизилдин лекь” къизилдин орден гуниз талукь шад мярекат кьиле фена.
Рамиз Нурдиновичаз ва финансринни праводин институтдин педагогрин коллективдиз и награда, “Регионрин фикир” фондуни кьиле тухузвай “Республикадин милли эменни” проектдин сергьятра аваз, Дагъустандин гзаф миллетрикай ибарат халкьдин вилик чирвилер гунин гьерекат хъсанарунин, акьалтзавай несил эдеб-ахлакьдин, марифатдин ва ватанпересвилин рекьерай тербияламишунин карда хьанвай кьетIен агалкьунрай, республикадин образованидин хел виликди тухунай ганва.
Образованидин хиле муаллим яз кIвалахай яргъал йисара Рамиз Нурдиновича жегьилар тербияламишуниз ва образованидин ери хкажуниз талукь еке кIвалах кьиле тухванва.
Р.Н.Алиев автор яз, акьалтзавай несил тербияламишунин карда еке важиблувал авай, ашкъидалди ва итиж аваз кIелиз жедай “Гьажи Давуд” цIийи ктаб урус чIалалди чапдиз акъатнава. Гьажи Давуд муьшкуьрвидин — экуь ва къени фикиррал алай реформатордин, ругьанидин уьмуьрдин чешнейрал алаз Ватан кIан, хайи чил хуьз ва адан аваданвал, хушбахтвал патал зегьмет чIугваз гьазур хьунин гьиссер тербияламишзава.
«Лезги газет»
