И йикъара Дагъустандин здравоохраненидин министр Татьяна Беляевадин къарардалди республикадин хуьрерин чкайра здравоохранение вилик тухуник еке пай кутунай мергьяматлувилин “Сагълам хуьр” проектдин автор ва регьбер Загьир Хидирович Агъамоваз Гьуьрметдин грамота гана. Ам чи ватандашдив республикадин здравоохраненидин министрдин заместитель Раиса Шагьсиновади вахкана.
З.Агъамов Москва шегьердин 115-нумрадин поликлиникадин духтур, Н.А.Семашкодин тIварунихъ галай общественный сагъламвал хуьдай Милли НИИ-дин къуллугъчи, медицинадин илимрин кандидат, “Москвадин духтур” лагьай тIварцIин сагьиб, илимдин 15-далай виниз кIвалахрин автор, Россиядин урологрин ва онкоурологрин обществойрин член я.
2020-йисалай Загьир Хидировича Дагъустанда мергьяматлувилин “Сагълам хуьр” проект кьилиз акъудзава. Яргъал хуьрерин агьалийриз Москвадин ва республикадин вилик-кьилик квай клиникайрин духтуррин бригадайри абурун сагъламвал ахтармишзава, лазимвал аватIа, ахьтинбуруз федеральный клиникайра виниз тир технологийрин куьмек агакьарун тешкилзава. Къенин юкъуз Мегьарамдхуьруьн, Агъул, ЦIунти, ЦIумада, Дербент, Леваша районрай тир 3500-далай виниз ксарин сагъламвал ахтармишдай, гзаф кьадар азарар винел акъуддай, азарлуйрив пешекаррин куьмек агакьардай мумкинвал хьана. Ахьтинбурун жергедай яз (чпив тади гьалда виниз тир технологийрин медицинадин куьмек агакьарун чарасуз тир) 100-далай виниз азарлуйриз духтур Агъамова ва кIвалахдин рекьяй адан юлдашри Москвада ва Дагъустан Республикадин медицинадин идарайра квотайрин сергьятра аваз чпин сагъламвал мягькемардай мумкинвал гана.
Рагнеда Рамалданова
