Муьжуьд йисуз Дагъустан Республикадин Халкьдин Собранидиз регьбервал гайи адан Председатель Хизри Шихсаидов вичин хушуналди къуллугъдилай элячIна. Идан гьакъиндай ада ислен юкъуз ТАСС-диз хабар гана.
“Къуллугъдилай элячIун хсуси зи къарар я. Официальнидаказ лагьайтIа, и кар сессиядал депутатри сес гуналди акьалтIда, мумкин я, — гьафтедин эхирда. Зун депутатрихъ галаз рахана ва за абурувай зун ял ягъиз рекье тунин гьакъиндай тIалабзава”, — лагьана ада.
Х.Шихсаидова мадни къейд авуна хьи, республикадин парламентдин цIийи председатель хкядалди, адаз сад лагьай заместитель Сайгидагьмед Агьмедова регьбервал гуда.
Шихсаидов Дагъустандин Халкьдин Собранидин спикервиле 2013-йисуз хкянай. Ам гьакI “Сад тир Россия” партиядин региональный отделенидин секретарни тир. Алатай гьафтеда а партиядин генсоветдин президиумди ам секретарвилин къуллугъдикай азадна.
Дагъустандин Халкьдин Собранидиз депутатар алай йисан зулуз кьиле фидай сечкийра хкяда.
«Лезги газет»
