8-июндиз Дагъустандин Кьилин везифаяр вахтуналди тамамарзавай Сергей Меликован регьбервилик кваз РД-да цIийи коронавирусдин тIугъвалдихъ галаз женг чIугвадай Оперативный штабдин нубатдин заседание хьана. Идакай “Лезги газетдиз” РД-дин Кьилин пресс-къуллугъди хабар гана.
Сифте нубатда Сергей Меликова регионда санитариядинни эпидемиологиядин гьалар пис жезвайди къейдна: “Чаз азарханайра чпин сагъламвал мягькемарун лазим къвезвайбурун кьадар артух жезвайди аквазва. Къенин юкъуз ковиддин отделенийра 1100 -далай виниз азарлуйри медицинадин куьмек къачузва, абурун кьадар саки 500-дан артух хьанва”.
И жуьреда кьадар гзаф хьун региондин Кьили диндин, гьакIни майдин сифте паюна кьиле тухвай суваррихъ, мехъеррин кьадар гзаф хьунихъ галаз алакъалу тирди къейдна.
И жигьетдай республикадин регьберди азардиз акси рапар ягъунин важиблувилел, гьа са вахтунда вакцинациядиз акси информационный кампания кьиле физвайдал фикир желбна. Алатай йисан чIуру гьалар арадал тахтун патал ада азардиз акси рапар ягъуниз эвер гана. Анал лагьайвал, региондин здравоохраненидин министерстводи мумкинвилерин сергьятра аваз кIвалах кьиле тухузва. Амма чкайрал ам активламишун лазим я.
Азардиз акси рапар ягъун зайифдаказ кьиле финихъ, азарлу жезвайбурун кьадар артух хьунихъ галаз алакъалу яз, РД-дин Кьилин везифаяр вахтуналди тамамарзавайда чпи регьбервал гузвай районра ва шегьерра агьалияр коронавирусдин азар чукIуникай хуьн тийизвай муниципалитетрин регьберриз чеб алай къуллугърилай элячIун теклифна.
“Ша чун квехъ галаз икI икьрар жен, джентльменвилелди. Ингье гуьгъуьнин оперативный штаб кIватIда, эхиримжи чкаяр кьур (муниципалитетрин) вад кьили чпин хушуналди ихьтин бинедаллаз арзаяр кхьида: “Завай муниципальный тешкилатдиз регьбервал гуз алакьзавач, гьикI лагьайтIа, залай зи районда яшамиш жезвай агьалийрин хатасузвал таъминариз жезвач”. ИкI дуьзвилелди а регьбер алатда, — лагьана региондин Кьили. — За квевай февралдин вацра азардиз акси рапар ягъун тешкилун тIалабнай. Гьинава и вакцинация тешкилун? Куьне ам акI тешкилна хьи, чун Россияда 85-чкадал ала”.
Роспотребнадзордин РД-да авай Управленидин регьбер Николай Павлова республикада санитариядинни эпидемиологиядин гьаларикай ва COVID-19 чукIун тавун патал кьабулзавай серенжемрикай гегьеншдаказ суьгьбетна. Ада хабар гайивал, эхиримжи юкъуз 50 кас азарлу хьайиди дуьздал акъудна. Эхиримжи 3 гьафтеда азарлуйрин кьадар артух жезва. Мадни хабар гайивал, Дагъустандин хуьрера санлай вири хизанар азарлу хьанвай дуьшуьшарни ава.
“Азарлу хьайибурун арада 40-далай виниз яшара авай инсанар гзаф я. Иллаки — 50-60 йисара авайбур. 65 йисалай алатнавайбурукай азарлу хьун 35% артух хьанва. И рекъем эхиримжи 3 гьафтеда саки 15-20 % хкаж хьанва. Им инсанар дагълух районриз хъфинин, мукьва-кьилийрал кьил чIугунин, санлай гзаф инсанрин иштираквал аваз кьиле тухузвай мярекатра, мел-мехъеррик ва хийир-шийиррик иштиракунин нетижа я”, — къейдна ада.
РД-дин здравоохраненидин министрдин везифаяр вахтуналди тамамарзавай Салман Агьмедова медицинадин ерилу куьмек агакьарунин ва республикадин агьалийриз коронавирусдиз акси рапар ягъун тешкилунин серенжемрикай суьгьбетна. Адан гафаралди, коронавирусдик азарлу хьайи агьалийриз куьмекун патал республикада 1393 чарпай (койка), реанимациядин ва ИТ-дин (интенсивный терапия) отделенияр патал 135 чарпай кардик кутунва, ИВЛ-дин аппаратралди таъминарнава.
Коронавирусдиз акси рапар ягъуниз талукь яз, министрдин везифаяр вахтуналди тамамарзавайда хабар гайивал, алатай йисан августдилай къенин йикъалди Дагъустандиз ковиддин азардиз акси дарманар (рапар) 118 агъзур дозадилай гзаф агакьнава, абурукай 101 агъзурдалай виниз ишлемишнава.
«Лезги газет»
