РД-дин информациядин ва печатдин министерствода Мегьамедсалигь Мегьамедович Гусаев дидедиз хьайидалай инихъ 70 йис тамам хьуниз бахшнавай мярекат кьиле фена.
Хуш гьалара кьиле фейи гуьруьшдал адан иштиракчийри 2003-йисан августдиз террористрин гъилелай мусибатдин гьалара телеф хьайи Дагъустандин машгьур хва, РД-дин милли политикадин, информациядин ва къецепатан алакъайрин министр М.Гусаев рикIел хкана.
Ана министр Умаросман Гьажиева, “Дагъустандин правда” газетдин кьилин редактор Бурлият Токболатовади, “Дагъустандин дишегьли” журналдин кьилин редактор Наида Керимовади, гражданвилин общество вилик тухунин ва инсандин ихтияррин рекьяй РД-дин Кьилин патав гвай Советдин председатель Зикрула Ильясова, Дагъустандин журналистрин Союздин председатель Али Камалова, политолог Эдуард Уразаева, М.Гусаевакай кхьенвай ктабдин автор, журналист Ризван Ризванова, Дагъустан Республикадин хуьруьн майишатдин ва суьрсетдин виликан министр Умалат Насрутдинова, ДГУ-дин доцент Гьамид Мегьамедова ва маса ксари иштиракна.
“Ам виридалайни муракаб вахтунда цIийи Дагъустан арадал атуник еке пай кутур, масабурув гекъигиз тежедай хьтин кас тир. Государство туькIуьр хьун, миллетрин арада алакъаяр ва динрин арада рафтарвилер, къецепатахъ галаз алакъаяр, информациядин политика — ибур М.Гусаева итиж ийизвай хилерикай тир. Адаз гьам республикадин, гьам федеральный властри ихтибардай. Государстводин кIвалахдив эгечIдай тегьердал, виниз тир пешекарвилел ва четин гьалара анжах дуьзгуьн къарар кьабулунал гьалтайла, ам амайбурулай хейлин вине тир”, — лагьана Умаросман Гьажиева.
Информациядин ва печатдин министрди йисан къене М.Гусаев рикIел хкуниз бахшнавай зурба серенжем кьиле тухун теклифна, анал адан политикадин ва илимдин ирсиниз килигда. ГьакIни министрди алай йисуз М.Гусаев, З.Арухов, Г.Къурбанов, Г.Абашилов рикIел хкуниз талукьарнавай ктабар цIийи кьилелай ахкъудунин къарарни кIелна.
У.Гьажиеван гафаралди, гьар са цIийи несилдиз республика, адан экуь гележег патал чан эцигна къуллугъай ва экуь гележег патал чеб къурбанд авур машгьур гьар са дагъустанвидикай мад ва мад сеферда суьгьбетар авун чарасуз я.
«Лезги газет»
