2-мартдиз ДГПУ-да РАО-дин член-корреспондент Жафар Михайлович Маллаеван регьбервилик кваз кьиле фейи университетдин къене авай Диссертацийрин советдин заседанидал Калмыкия республикадин Б.Б.Городовикован тlварунихъ галай гьукуматдин университетдин векилри Диссертацийрин советдин секретарь, профессор Шайдабег Айдабегович Мирзоев академик Г.Н. Волкован тlварунихъ галай медалдалди къейдна.

Къейд ийин, Шайдабег Мирзоев чи уьлкведин тlвар-ван авай алим, Россиядин этнопедагогикадин илимдин мектебдин бине эцигайди тир Г.Н.Волкован сад лагьай аспирант хьана.

Медаль гайи шад мярекатдин сергьятра аваз алим Шайдабег Айдабеговичаз дустари, багърийри и чlехи шабагь мубаракна ва мягькем сагъламвал, яратмишунра агалкьунар тlалабна.

Дагъустанда вич халкьдин педагогикадиз, медениятдиз, адетриз талукь ктабрин, мектебар патал са шумуд учебникдин автор яз машгьур тир Шайдабег муаллимдиз чна «Лезги газетдин» тlварцlихъайни шабагь тебрикзава.

Куругъли Ферзалиев