2-мартдиз Дагъустандин Гьукуматдин Председатель Артем Здунова Гьукуматдин векилрихъ галаз кlвалахдин совещание кьиле тухвана.

Нубатдин совещанидин сергьятра аваз Гьукуматдин векилрин гуьзчивилик квай крарин гьалдин ва 2015-2017-йисарин нетижайрин, жуьреба-жуьре программайра, проектра иштиракунин ва и месэлаяр вилик тухунин рекьерин гьакъиндай ихтилатарна.

Артем Здунова агьалийрин чарариз, арзайриз кьетlен фикир гуниз эверна.

«Инсанри Гьукуматдиз, гьакlни муниципальный гьукумдиз чарар кхьена кlанзавайди я, им адетдин кар я. Гзаф месэлаяр пулдин такьатар истемишзавайбур я, амма, им гьакl алудун патал агьалийриз жавабар кхьинал машгъул хьана кlанда лагьай чlал туш. Министерствойра ихьтин басмадин гафар къекъвезва: «Куь месэла 2018-йисуз ва гуьгъуьнин йисара гьялда», исятда лагьайтlа, икl кхьизва: куь месэла 2019-йисуз гьялда. Яни, куь месэла гьялна куьтягьдач. Ихьтин крарилай кьулухъ, гьукуматдихъ галаз агьалийрин рафтарвал гьихьтинди хьана кlанзава? Гьар са чарче, а месэла гьялдай жавабдар касдин фамилия пайда хьун герек я. Низ кхьин герек ятlа, исандиз чир хьун лазим я. Им жергедин къуллугъчи хьунни мумкин я. Амма ам чкадал хьун ва адаз и ва я маса месэла гьикl гьялдатlа чир хьун лазим я. Инсанриз чна пулдин такьатар са акьван бес тежезвайдини лугьузва. Къе базаррин ва шадвилин мярекатар тухудай тавханайрин сагьибрихъ галаз совещание тухуда. Бюджетдин такьатар кlватlунал машгъул жеда. Амма инсанриз чир хьана кlанда хьи, абурун месэла гьамиша гуьзчивилик ква. Зи тlварцlихъай метлебсуз, гьакl алудун патал жавабар кхьин герек туш. Эгер жавабдар касди гуьзчивилик кутунин муддат чlурайтlа, жаза гуда», — лагьана Артем Здунова.

Куругъли Ферзалиев