ТIебиатдин гуьрчег пипIерикай сад тир Сулейман-Стальский райондин Магьмутахуьруьн агьалияр, залзала хьун себеб яз, са шумуд хуьруьз куьч хьана: ЦIийи ЦIелегуьндал, Советский хуьруьз, Герейханован совхоздиз. Куьгьне хуьр лагьайтIа, кьуд патахъай таму-тара кьунвай гуьнедал экIя хьанва. Ам мал-къара хуьдай мублагь чIурар, емишрин багълар авай макан тир.
Хуьр са шумуд чкадал чкIанатIани, магьмутахуьруьнвийри хайи ерияр рикIелай алудзавач. Хуьруьн кIанихъай хъархъун тарцин кIаняй авахьзавай булахди агьалияр желбзава, суварар хьайила, анал, хуьр рикIел хкиз, шадвилер кьиле тухузва. Герейханован хуьре яшамиш жезвай магьмутахуьруьнви Базутов Шагьабудина, ацукьдай стол, чаяр хъвадай къаб-къажахни тухвана, иниз атай ял ядайбуруз вичивай жедай къулайвилер авунва. Ам вичин хуьруьнвиярни галаз анал мукьвал-мукьвал хъфизва.
Магьмутахуьр эвелукрин макан я лагьана ван хьайила, зун зи рагьметлу диде Минихалуман ва чIехи диде Гьабидатан ерияр тир и хуьруьз, абур дигмиш хьайила, са шумудра хъфенай.
Эвелукрикай рахайтIа, заз абурун сир чидач. Гьар гъилера аниз хъфейла, заз ана Испикрин, Салиянрин, Шихидхуьруьн ва маса хуьрерин агьалиярни шешелралди эвелукар атIуз аквазва. Чна са дишегьлидивай и набататдин кьетIенвал вуч я лагьана хабар кьурла, ада эвелукрин гзаф тариф авуна, абур кьурурна, хъуьтIуьз чпи афарар, хинкIарар ийизвайдакай ва базаррани абуруз къимет авайдакай лагьана. ЦIинин йисуз эвелукрин макандиз атай инсан, кьуд патан гуьлуьшанвал акваз, гьейран хьана амукьзава.
Вадим Жамалдинов
