Алай йисуз Кеферпатан Кавказдин ракьун рекьин переездрал транспортдихъ галаз алакъалу 17 авария хьанва, абурукай 5 дуьшуьш Дагъустан Республикадал гьалтзава.
Виридалайни мусибатдин авария, алай йисан 15-мартдин пакаман сятдин 8 жез 9 декьикьа амайла, Къизляр шегьердин мулкунал алай 17- километрдин разъезддал хьана.
Дежурный къуллугъчи галачиз гуьнгуьна твазвай (регулируемый) переезддал, хаталу вахтара акатзавай хабар гузвай сигнализациядин система (АПС) кардик кваз, Тюмендай Махачкъаладиз къвезвай поезд ва И.Б.Кусаева (1985-йисуз дидедиз хьанвай) гьалзавай ВАЗ 2112 автомашин (М 275 СС, 05 рег.) сад-сада акьуна. Са сятина 90 километрдин мензил атIудай йигинвал аваз къвезвай поезддин машинистдиз чапла патахъай къвезвай автомашин акуна ва ада тади гьалда кардик кутазвай тормоз ишлемишна. Амма, арада авай мензил гъвечIиди хьуниз килигна, мусибатдин вилик пад кьаз хьанач. Автомашиндин шофер И.Б.Кусаев чкадал кьена. И машиндин пассажирар С.А.Кусаева (1986-йисуз хайи) ва Х.И.Кусаева (2013-йисуз хайи) Къизлярдин центральный больницадив агакьарна, амма гуьгъуьнлай абурни кьена.
Себеб — автомашиндин водителди РФ-дин рекьерал гьерекат авунин къайдаяр (ПДД) чIурна.
Майдин вацра агъур дуьшуьш арадал атана. ИкI, 9-майдин йифен сятдин 1-даз 17 декьикьа кIвалахайла, Къарабудахкент райондин мулкунал алай Тарки-Манас перегондин дежурный къуллугъчи алачиз идара ийизвай 2307- километрдин переезддал, АПС кардик кваз, са сятина 80 километрдин мензил атIудай йигинвал аваз мукьва жезвай 7902-нумрадин поезддин вилик К.Г.Мегьамедова (1974-йис) гьалзавай Lexus RХ 350 автомашин акъатна (В 271 РХ 26). ДТП-дин нетижада автомашиндин шофер ва пассажир Каспийск шегьердин больницадиз агакьарна. Себеб — автомашиндин водителди ПДД-дин къайдаяр чIурна.
Гьуьрметлу шоферар! Переезддилай элячIдайла, вилик квай машин садлагьана акъваз хьайитIа ва я адан йигинвал явашарайтIа, куь транспортдин такьат переезддин юкьвал, яни ракьун рекьел акъваз хьун арадай акъудун патал машинрин арада лазим тир мензил хуьх. Жув, куь пассажирар, поездра авай ва переездрин патарив гвай инсанар хаталувилик кутамир! Багърийрин ва мукьва-кьилийрин саламатвал квелай аслу я! Декьикьаяр кьенят авуналди, куьне вишералди инсанар бахтсузарун мумкин я! РикIел хуьх: поезд акъвазарун патал вахт лазим я, уьмуьр акъвазарун патал — легьзе.
Захар Адамов,
Кеферпатан Кавказдин ракьун рекьин Махачкъаладин территориальный управленидин начальникдин заместитель.
