Ахцегь районда карчияр тIимил авач. Абурукай бязибуру хсуси такьатар инсанрин дуланажагъ хъсанарун, рекьер, къаналар, булахар, мискIинар ремонт авун, эцигун патал, гьакI мергьяматлувилин маса крариз серфзава. Гьелбетда, ахьтинбуруз жемятди чухсагъул, аферин лугьузва. Пак гьадисра кхьенвайвал, девлетдикай анжах ам гьикI ва гьиниз харж авун лазим ятIа чидай касдиз еке хийир ава.
Ахцегьви карчи Рафик Талханов жемятдин игьтияжар патал хсуси пулдин такьатар серфзавай карчи я. Мисал яз, гьамамдин рекьяй Уьшехънарин магьледин “Лай” участокдиз фидай муьгъ къайдадикай хкатна хейлин вахт тир. И муькъвелай автотехника гьалун гзаф хаталу хьанвай. ИкI тиртIани, инаг ремонт хъийидай кас жагъизвачир. И кардикай хабар хьайи Р.Талханов (ам вични виликдай гьа и магьледа яшамиш хьайиди я) чкадал муькъуьз килигна, лазим тир эцигунрин материалар къачуна. Муьгъ ремонт авун ада вичин стха Радик Талхановал тапшурмишна. Ам куьмекчиярни галаз кIвалахдив эгечIна.
Муьгъ ремонт авунин карда устIар Радик Талханова, фялеяр тир Паша Къужаева, Гьемзе Мирзабегова, Эрзиман Алирзаева активнидаказ иштиракна. Алай вахтунда муькъуьн къваларихъай ва чарасуз маса чкайрилай хатасузвал хуьдай бетондин блокарни эцигнава.
Амма гележегда муьгъ капитальный ремонт авунин чарасузвал ава. Адан кIаник кутунвай гъварар китIиз башламишнава. Умудзава хьи, и кар гъиле кьадай мергьяматлу спонсор-карчини жагъида.
Рагьидин Эминов
