“Чандилайни абур багьа, намус саф…”
Апрелдин эвел кьилера Махачкъалада, “Лезги газетдин” редакциядин конференцийрин залда, Пенза шегьерда яшамиш жезвай лезги гьикаятчи, шаир Садикь (литературадин тахаллус — Садко) Гьажиеван уьмуьрдин ва яратмишунрин рекьиз бахшнавай мярекат кьиле фенай. Ана иштиракай ксари писателдин къелемдикай хкатнавай эсеррикай, адан хатIунин кьетIенвилерикай, лезги эдебият вилик финик ада кутунвай паюникай чпин фикирар лагьана.
И йикъара бине Кьурагь райондин КIирийрин хуьряй тир Садикь Абумуслимович Гьажиеван 90 йис тамам хьанва. “Лезги газетдин” редакциядин коллективди чи баркаллу ватанэгьлидиз и вакъиа рикIин сидкьидай мубаракзава, адахъ чандин сагъвал, яргъи уьмуьр, яратмишунрин рекье мадни еке агалкьунар хьана кIанзава.
С.Гьажиева хуьруьн мектебда 7-класс акьалтIарайдалай кьулухъ колхозда кIвалахна. 1947-йисуз ам Бакудиз фена, “Артемнефть” тIвар алай карханада сифте слесарь, гуьгъуьнлай механик, комсомолрин тешкилатдин секретарь яз зегьмет чIугуна.
Советрин Армиядин жергейра къуллугъзавай йисара ада сержантар гьазурзавай мектеб акьалтIарна ва С.Гьажиев кьилдин дивизияда офицердин къуллугъда аваз комсомолрин тешкилатдин секретарь яз хкяна.
1954-йисуз кIириви СССР-дин МВД-дин Ленинградда авай военно-политический училищедиз гьахьна. Анаг акьалтIарай 1961-йисуз ам направленидин бинедаллаз Пензадин областдин УВД-диз акъатна. Ина жегьил офицерди отряддин, колониядин режимдин паюнин начальникдин везифаяр тамамарна.
Садикь Гьажиева 1968-йисуз марксизмдин-ленинизмдин университет акьалтIарна, хейлин йисара МВД-дин органра, УИН-дин къурулушда къуллугъна. 1988-йисуз майордин чинда аваз кIвалахдивай къерех хьана. 25-йисуз къанун-къайда хуьдай органра намуслувилелди къуллугъ авунай Садикь Гьажиев “МВД-дин хъсан къуллугъчи” знакдиз, “РФ-дин УИС-дин къурулуш вилик тухунай” гимишдин ва хейлин маса медалриз, грамотайриз, савкьатриз лайихлу хьанва. Ватандин ЧIехи дяведин ветеранди кьве веледдиз — хцизни рушаз тербия гана.
Кьисметди хайи хуьруьвай яргъаз — Пенза шегьердиз акъуднатIани, Садикь Гьажиева багъри ерийрихъ галаз авай алакъаяр кьатIнавач. Ам мукьвал-мукьвал КIиридиз хкведай, мукьва-кьилийрал кьил чIугвадай, вичин нубатдин ктаб патал материлар кIватIдай. Асул кIвалах къанун-къайда хуьдай органрихъ галаз алакъалу хьанатIани, адаз Аллагьди яратмишдай пай ганвай. 1954-йисалай адан эсерар “Коммунист” газетдиз, “Дуствал” альманахдиз акъатзавай. 1978-йисуз писателдин къелемдикай Советрин Союздин Игит Эсед Салигьоваз бахшнавай шиирралди кхьенвай “Дагъларин хва” роман хкатна. Гуьгъуьнлай ада “КIири Буба”, “Дагълар шагьидар я” ва маса романар, цIудралди поэмаяр, вишералди шиирар кхьена. Абурукай гзафбур лезги ва урус чIаларал кьилдин ктабар яз чапдай акъатнава. Исятдани Садикь Гьажиеван яратмишунрин жебеханада гьеле чапдай акъат тавунвай 4 ктаб ава.
Садикь Гьажиева, лезги чIалал хьиз, урус чIалални теснифзава. Адан гзаф кьадар эсерар урус чIалал акъатзавай газетрани журналра чапнава, кьилдин ктабар яз акъатнава. 2015-йисалай Урусатдин писателрин Союздин член я.
И йикъара Садикь Гьажиева шад гьалара, багърийрихъ галаз санал вичин 90 йисан юбилей къейдна. И шад вакъиа адаз РФ-дин Президент Владимир Путина, РФ-дин ФСИН-дин директор Александр Калашникова, Пензадин областдин губернатор Олег Мельниченкоди, областдин ФСИН-дин руководстводи, депутатри ва масабуру тебрикна. Чи кьегьал ватанэгьлидихъ яргъал тир Пензадин областда еке гьуьрмет хьунал чна лайихлудаказ дамахзава. Агъадихъ чна газет кIелзавайбуруз Садикь Гьажиеван са шумуд шиир теклифзава.
Мегьамед Ибрагьимов
