И йикъара Дербентдин деподин клубда ракьун рекьин музейдин гьевескарри акъудзавай “Семафор” тIвар алай газетдин цIуд йисан юбилей къейдна. И газет сифте “Сапсан” тIвар алаз, Россиядин журналистрин Союздин ва Международный журналистрин тешкилатдин член, а вахтунда Араблинский станциядин начальник тир Гьажиагъа Араблинскийди (Мегьамедшерифова) кьилин редакторвилин везифаяр вичин хивез къачуна, 2011- йисуз акъудиз башламишайди тир. Газетдиз Махачкъаладин ракьун рекьин участокда жезвай хабарар акъудзавай. Редколлегия газетдин жавабдар секретарь, (а вахтунда) лезги тарсарин муаллим, Дагъустандин халкьдин образованидин отличник Аят Мегьамедшерифовадикай, литературадин чинин редактор, Россиядин журналистрин Союздин векил, деподин къазанханадин оператор Адиширин Ялахъвидикай (Алибегов), газетдин корректор Амирхан Мегьамедшарифовакай ибарат тир.
РикIел хкин, гьевескарри тешкилнавай, вацра садра акъатзавай газетди вичин чка кьун патал типографиядиз сифтегьан 12 нумрадин гьакъи кьилин редакторди вичин жибиндай ганай. Кьвед лагьай йисуз, газет вичин кьацIа гьатайла, яни кIелзавайбурун арада машгьур хьайила, типографиядин пул нубатралди ракьун рекьин станцийрин начальникри гуз хьанай. Абурун арадай яз Къачай Мугуеван (Махачкъаладин ст.), Гьасанбег Бабаеван (Дербентдин ст.), Атакши Амрахован (Дагъустандин Огнидин ст.), Чайдабег Расулован (Мамедкъаладин ст.) ва масабурун тIварар кьаз жеда. Пуд лагьай йисалай газет акъудунин гьакъи гун Махачкъаладин региондин ракьун рекьин цIийиз хкянавай профсоюздин тешкилатдин председатель Руслан Омарова (гила адакай Кеферпатан Кавказдин Дорпрофжелдин председателдин заместитель хьанва) тешкилатдин хивез къачуна. И кар адан чкадал тайин хьайи Нурудин Феталиевани давамар хъийизва. Пара сагърай чеб!
2019- йисан сад лагьай нумрадилай газетдин тIвар “Семафор” хъувунва. Газетдиз Дербентдин ракьун рекьин музейдин цIийивилерикай ва анал мадни абур гъун патал чалишмиш жезвайбурукай мукьвал-мукьвал макъалаяр чапзава. Мисал яз, мартдиз ва апрелдиз хьайи субботникра паровоз — памятникдиз шир ягъунин карда иштиракай Дербентдин ракьун рекьин колледждин студентрикай шикиларни галаз макъала акъуднай…
Юбилейдин мярекатдал редколлегия тебрикиз атанвай Дербентдин администрациядин культурадин, жегьилрин политикадин ва спортдин управленидин начальник Самиля Нажафовади деподин ветеранрин Советдин председатель Абдулмежид Муслимоваз, поэтесса Натали Ниятаз, кьилин редактор Гьажиагъа Араблинскийдиз вичин патай чухсагъулдин чарар гана.
Ахпа тебрикар авур Россиядин лайихлу артист Абдуллагь Гьабибова, Россиядин писателрин Союздин членар тир РД-дин культурадин лайихлу работник ТIагьир Салегьа, РД-дин лайихлу юрист Абил Сардара, Тахмираз Имамова, Пейсах Мишиева (тат халкьдин шаир), Россиядин журналистрин Союздин член, “М” типографиядин директор Муслим Сурхаева газетдиз чIехи къимет гана. Газетда шиирар акъудиз башламишай Тахмираз Имамов къе Россиядин писателрин Союздин член хьанва. Газетда шиирар акъудиз сифте камар къачур Натали Ният къе шииррин кьве кIватIалдин автор я. Чи шаир, манидар ва композитор Зайнаб Султанагьмедовадикай кьилди лугьуз кIанзава. Адан жавагьирар тир шиирар сифте газетдин кьилин редакторди урус чIалал таржума авуна акъатнай. Ахпа адан “Буьгьтен” тIвар алай повесть урус чIалал газетдин чинриз акъатайла, газет кIелзавайбуру, повестдин кьатI мус акъатда лугьуз, редакция секиндиз тадачир.
Сифте “Сапсан” ва гила “Семафор” газетди алатай 10 йисан (94 нумра акъатнава) вахтунда вичин чка мягькемдиз кьунва ва кIелзавайбуру нубатдин гьар нумра итижлудаказ вилив хуьзва.
Газетдин тIварцIел СССР-дин Гьуьрметлу железнодорожник, ДГТУ-дин старший преподаватель Вячеслав Иноземцева ракъурнавай тебрикдин чар ихьтин гафаралди башламиш жезва:
“Заз “Семафор” газетдиз, ам арадал гъайи кас ва кьилин рекдактор тир Гьажиагъа Мегьамедшерифоваз, редакциядин коллективдиз кьиле тухузвай кIвалахдай чухсагъул лугьуз кIанзава. Газетди ракьун рекьин пешеяр машгьурзава. И кардик Россияда ва, кьилди къачуртIа, Дагъустанда ракьун рекьин хел виликди тухунин тарих къалурзавай Дербент станциядал алай музейдини еке пай кутазва…”
Гитlин Дагъ
