Финансрин рекьяй савадлувал
13-апрелдилай 17-майдалди Учи.ру платформадин бинедаллаз уьлкведин 1-9-классра кIелзавай аялрин арада “Жаван карчи ва финансрин рекьяй савадлувал” онлайн-олимпиада кьиле физва, хабар гузва чаз Дагъустан Республикада авай Милли банкунин отделенидин пресс-къуллугъди. Проект Россиядин Банкунин ва финансрин рекьяй савадлувал хкажунин Ассоциацияди уьмуьрдиз кечирмишзава. Абуруз и карда “ГъвечIи ва юкьван карчивал ва кьилдин карчийрин теклифриз куьмек гун” милли проектди ва РФ-дин экономикадин рекьяй виликди финин министерстводи куьмек гузва.
“Карчивилиз ва финансрин рекьяй савадлувилиз талукь Вирироссиядин онлайн-олимпиададин ахтармишунин тур кьиле тухвай сад лагьай гьафтедин вахтунда ада Дагъустандин мектебра кIелзавай 8 агъзурдалай гзаф аялри иштиракна. И делилдай регион уьлкведа 5 лагьай чкадал ала. Россиядин Банкунин финансрин рекьяй савадлувилиз талукь проектра иштиракзавайбурун арада чи республика датIана вилик жергейра ава”, — лугьузва Дагъустан Республикада авай Милли банкунин отделенидин руководитель Мурад Идрисова.
Мярекатдин кьилин макьсад карчиди хьиз фикир авунин, кьатIунунин асул бинейрихъ галаз танишаруникай ва финансрин рекьяй савадлувал хкажуникай ибарат я.
Олимпиададин вахтунда мектебра кIелзавай аялри гьакъикъи бизнес-месэлайриз ухшар гьаларай кьил акъудда, финансрин продуктар хкягъиз ва гекъигиз, финансрин базарда авай луту-птуйрикай чеб хуьз чирда. Олимпиадада иштиракун патал гьакъи гун герек туш ва мектебрин программаярни дериндай чир хьунин шартI авач.
Акъажунрин асул тур башламишай юкъуз, 27-апрелдиз, Россиядин Федерациядин 13 субъектда олимпиада шад гьалара ачухунин мярекатар кьиле фена. И юкъуз Россиядин Банкунин председатель Эльвира Набиуллинади “Хсуси финансар нетижалудаказ идара авун патал экономикадикай вуч чир хьун лазим я?” месэладай ачух онлайн-тарс кьиле тухвана. И тарсуник уьлкведин гьар жуьре пипIерай тир мектебар экечIна.
Тарсуна иштиракай аялриз инфляция вуч ятIа, ада финансриз гьикI таъсирзаватIа, экономикадин рекьяй виликди финин йигинвални хсуси агьваллувал гьикI алакъалу ятIа, гьакIни экономикадин ставкаяр дегиш хьун гьар са кас патал важиблу ятIа чир хьана. Эльвира Набиуллина пулдин такьатар, сад лагьай къазанжидилай башламишна, дуьздаказ паюнин месэладал кьилди акъвазна.
И месэлайриз итиж ийизвайбурувай онлайн-тарсуниз мярекатдин официальный сайтдин (proofix.ru), Учи.ру платформада авай муаллимрин ва аялрин хсуси чинрин, Россиядин Банкунин “ВКонтакте” сайтда авай чинин, гьакIни Россиядин Банкунин финансрин савадлувилин рекьяй онлайн-тарсарин сайтдин куьмекдалди килигиз жеда.
Жасмина Саидова
