23-майдиз республикадин меркезда, Урусрин драмтеатрда “Дагъустандин дишегьлийрин Союз” общественный организациядин съезд кьиле фена. Алай йисуз и тешкилатдин 25 йис тамам жезва.
И мярекатда РД-дин Гьукуматдин Председателдин Сад лагьай заместитель Анатолий Къарибова, РД-дин Халкьдин Собранидин образованидин, илимдин, культурадин рекьяй комитетдин председателдин заместитель Людмила Авшалумовади, хизан, дидевал ва аялрин ихтиярар хуьнин рекьяй РД-дин Кьилин патав гвай уполномоченный Марина Ежовади, РД-дин милли политикадин рекьяй министр Татьяна Гамалея, культурадин министр Зарема Бутаевади, “Дагъустандин дишегьлийрин Союз” общественный организациядин кьилин везифаяр тамамарзавай Интизар Мамутаевади, СМИ-рин векилри иштиракна.
Съезд, 23 йисуз Дагъустандин дишегьлийрин Союздиз регьбервал гайи РД-дин халкьдин шаир рагьметлу Фазу Алиевадин экуь къамат рикIел хкун яз, са декьикьада кисна акъвазунилай башламиш хьана. Съезд ачухай Л.Авшалумовади сифте гаф А.Къарибоваз гана. Ада Дагъустандин дишегьлийриз и вакъиа тебрикна ва республикадин уьмуьрда и тешкилатди къугъвазвай ролдикай лагьана. Ада къейд авурвал, Союзди тухузвай кIвалахди дишегьлийрин кьисметра еке дегишвилер арадал гъана, абурукай итимрихъ галаз барабар тамам вири ихтиярар авай уьлкведин гражданар хьанва. Гзаф йисара дагъви дишегьлийри итимрихъ галаз санал республикадин общественный уьмуьрдин вири хилера иштиракзава, халкьдин патай еке гьуьрмет къазанмишнава.
А.Къарибован гафаралди, алай аямдин дагъви дишегьлийри хизан арадал гъунихъ, аялар тербияламишунихъ галаз санал, жуьреба-жуьре пешекарар яз, чIехи къуллугърални кIвалахзава. Республикадин Кьили гьукумдин вири къурулушра дишегьлийри кIвалахуниз еке фикир гузва. Вучиз лагьайтIа дишегьли авай гьар са чкада къайда, жавабдарвал ава. Республикадин милли культура, политика, экономика вилик тухуник абуру виле акьадай хьтин пай кутазва. Н.Къарибова алай вахтунда 7 дишегьли РД-дин Халкьдин Собранидин депутатар, пуд кас министрар, 17 дишегьли шегьерринни районрин администрацийрин кьилерин заместителар, хейлинбур фирмайрин регьберар тирди къейдна.
И.Мамутаевади дишегьли сифтени-сифте диде ва гьар са касдин уьмуьрда сад лагьай инсан тирди къейдна. “Дишегьлийрин хиве еке жавабдарвал ава, гьикI лагьайтIа, абуру чпин веледриз гузвай тербиядилай сифте абурун чпин, ахпани вири уьлкведин кьисмет аслу жезва”, — лагьана ада. Ада гьакI бизнесдал машгъул дишегьлийрин Совет, республикадин образованидин идарайра рушарин советар тешкилнавайди ва абурун макьсад яшайишдин шартIар хъсанарун, жегьилар инсанпересвилелди тербияламишунин дережа хкажун, адетар, культура хуьн, сагълам уьмуьр кечирмишун тирди къейдна.
Гуьгъуьнлай съезддал муниципалитетрин дишегьлийрин советрин председателар алай аямдин обществода дишегьлийри кьиле тухузвай важиблу крарикай рахана.
Земфира Бабаева
