Мегьарамдхуьруьн райондин администрациядин пресс-къуллугъди хабар гайивал, алатай гьафтеда райондин кьил Фарид Агьмедован регьбервилик кваз халкьарин арада садвал мягькемаруниз талукьарнавай совещание кьиле фена. Ана администрациядин жавабдар работникри, идарайрин руководителри, къенепатан крарин органрин къуллугъчийри, хуьрерин администрацийрин кьилери иштиракна.
Совещание Фарид Агьмедовав Дагъустандин госуниверситетдин патай “Чухсагъулдин чар” вахкунилай башламиш хьана. Мегьарамдхуьруьн райондин школьникри “ДГУ-дин абитуриент — 2017” лишандик кваз кьиле фейи Кеферпатан Кавказдин олимпиадада активнидаказ иштиракна. Адан кьилин макьсад бажарагълу аялрин алакьунар еримлу авуникай, гележегдин пеше хкягъунин, илимдин чирвилер хкажунин карда куьмек гуникай ибарат тир. “Чухсагъулдин чарчиз” райондин УО-дин начальник Улубег Абейдуллаевни лайихлу хьана.
Районда халкьарин арада садвал мягькемарун патал кьиле тухузвай кIвалахдикай общественный хатасузвал хуьнин рекьяй райондин кьилин заместитель Зайнуддин Азимова доклад авуна. Ада къейд авурвал, гьар гьафтеда районда халкьарин садвилиз, диндин алакъайриз, хатасузвал хуьниз, жегьилар экстремистринни террористрин жергейриз желб авунин вилик пад кьуниз талукьарнавай мониторинг кьиле тухузва. И рекьерай районда акьалтзавай несилдихъ галаз тайин тир кIвалах тухузва, конкурсар, ачух тарсар, концертар тешкилзава.
Профилактикадин бязи серенжемар райондин къенепатан крарин органри администрациядихъ галаз сих алакъа аваз кьиле тухузва. Къецепатан ульквейрин гражданри кIвалахзавай объектар вахт-вахтунда ахтармишзава.
Фарид Агьмедова образованидин идарайрин руководителриз агьалийрин арада садвал мягькемаруниз, динэгьлийрин арада меслятвал хуьниз, жегьилар ва жаванар хаталу крарикай хуьниз талукь серенжемар артухарна кIанзавайдакай лагьана.
Гьазурайди — Земфира Бабаева
