Малум тирвал, гьар районда, бязи хуьрерани ветеранрин, агъсакъалрин советар ава. Чи школайра кIелзавай аялриз ватанпересвилин тербия гунин, абур хъсандиз кIелунал желб авунин карда советрин кIвалахдихъ еке метлеб ава. И кар хъсандиз аннамишзавайвиляй Сулейман-Стальский райондин ветеранрин советди ва адан векилри акьалтзавай несилриз дуьзгуьн тарсар гун патал еке кIвалах тухузва. Ветеранри образованидин идарайра тешкилзавай мярекатрани хушвилелди иштиракзава. Заз къе абурукай, школайрин педколлективрихъ галаз авай зи хъсан алакъайрикай ихтилатиз кIанзава.
Советрин Союздин вахтара школайра кIелунинни тербиядин кIвалах хъсандиз кьиле физвай. Мектеб лап хъсандиз куьтягьай аялар университетдин ва я пединститутдин педагогвилин факультетрик экечIзавай. Гьа вузрани студентрив кIелиз тазвай, абурукай тамам чирвилер авай пешекарар гьазурзавай. Абуру регьятдиз школада кIвалахни ийизвай. Муаллимриз хуьрера гьуьрмет авай.
Алай вахтунда муаллимвилин пеше къачун патал вузриз хъсандиз школаяр куьтягьнавай жегьилар тIимил физва. Вузрани кIелунинни тербиядин кIвалах зайиф я, гьавиляй школайриз хъсан пешекарарни хквезвач. Вучиз муаллимвилин кеспи жегьилриз кIанзавач? Мажиб куьлуьди я — 12 000 манат. И пулунихъ муаллимдивай кьил хуьз жедани?
Къе ахьтин гьал арадал атанва хьи, школа куьтягьзавай, ЕГЭ вахкузвайбур тIимил я. Пул авай диде-бубайри чпин аялриз репетиторар кьазва. Лап хъсан баллар авайбур мединститутдиз, юридический, военный вузриз физва. Технический вузриз гзаф физвач, вучиз лагьайтIа, кIвалахдай заводар, фабрикаяр ва маса технический карханаяр тIимил хьанва, кIвалахдай чкаяр жагъизвач.
ГъвечIи мажибар къачузватIани, чпин кеспидал ашукь, гьевесдивди зегьмет чIугвазвай жегьил муаллимарни аваз хьунал за шадвалзава.
Школайриз фейила, военный форма алаз акурла, гадайри, патав къвез, заз гъилер яда. Абуруз форма хуш жезва, лезги гадаяр военный училищейриз гзаф физва, абурукай офицерар жезва. И кIвалах заз гзаф хуш я.
2020-йисан октябрдин вацра чи райондин ветеранрин советдин председатель Ислеман Ризаева, Кьулан СтIалрин хуьруьн, агъсакъалрин советдин председатель Абдурашид Межидова, юкьван школадин директор Ифриз Бабаевади, адан заместитель Зоя Гьабибуллаевади ва Игитдин стха Насирни галаз, зани Россиядин Игит Радим Халикьован памятникдал цуьквер эцигна.
Декабрдин вацра чаз Игитдин талукьарнавай мярекатдиз ша лагьанай. Ина Радим Халикьован диде Ханпери вах ва райондин администрациядин кьилин заместитель АбутIалиб Фатулаевни авай. Мярекат хъсандиз кьиле фена.
Агъа СтIал-Къазмайрин юкьван школада чна ДАССР-дин 100 йисан юбилейдиз талукьарнавай мярекатда иштиракна. Ана райондин кьилин заместитель АбутIалиб Фатулаев, образованидин управленидин начальникдин заместитель Къачабег Аминовни авай. Мярекат завуч Ханвердиева Шамсията ва тарихдин муаллим, СтIал Сулейманан птул Шагьмирзоева Тахминади хъсандиз кьиле тухвана. Дагъустандин тарихдикай суьгьбетна, шиирар кIелна, манияр лагьана. Школадин директор, тарихдин илимрин кандидат Асланов Жабраил еке тежриба авай педагог я. Ада школа чешнелуди авун патал аквадай кIвалах тухузва. Сентябрдиз школада кIелзавай аялар цIийиз эцигзавай хъсан дараматдиз хъфида. И школада зи пуд хтулди лап хъсан къиметар аваз кIелзава. Зи хтул Ислам Фатагьова лезги чIалай республикадин олимпиадада пуд лагьай чка кьуна. Олимпиада “Лезги газетди” ва “ЛЕКИ” фондуни тухванвайди тир.
Шихидхуьруьн юкьван школадиз фейила, чун анин директор Айдаева Раидади, адан заместитель Пирвелиев Феврала кьабулна. Ахпа муаллимрихъ галаз гуьруьш кьиле фена. Чна лезги халкьдиз, чи хуьрериз, школайриз ва аялриз талукь месэлайрикай ихтилатна. Школада ДАССР-дин 100 йис тамам хьуниз талукьарнавай межлис пара хъсандиз кьиле фена. И карни ам гьазурай психолог Муслимова Руминадин, пионервожатая Шихкъаибова Халисатан ва кьиле тухвай ученикар: Тагьирова Алинадин, Шихкъаибов Мегьамедсаидан агалкьун тир.
Февралдин вацра чаз (заз, отставкада авай полковникар )Загьиров Мусаибаз, Шагьпазов Шихкеримаз) Магьарамдхуьруьн райондин Хуьрелрин юкьван школадиз теклифна. Ина Советрин Союздин Игит Абас Исрафиловаз бахшнавай мярекат тешкилнавай.
Хив райондин ЦIинитIрин юкьван школадани захъ галаз аялрин рикIел аламукьдай гуьруьш кьиле фена. Школадин дарамат Ватандин ЧIехи дяве жедалди вилик эцигнавайди ятIани, хъсандиз ремонтнава.
Динамудин Алиев, Назим Гьажимегьамедов кьиле аваз, ина педагогрин хъсан коллективди зегьмет чIугвазва. Мадни агалкьунар хьурай чпихъ!
Масуд Магьмудов,
отставкада авай полковник
